തിരുവനന്തപുരം: സംസ്ഥാനത്ത് ആറുശതമാനത്തോളം പോളിങ് കുറഞ്ഞത് ഇടത്‌വലത് മുന്നണികള്‍ക്ക് തിരിച്ചടിയാണെന്ന് ബിജെപി സംസ്ഥാന അദ്ധ്യക്ഷന്‍ കെ. സുരേന്ദ്രന്‍. ഇരു മുന്നണിയുടെയും നിരവധി അനുഭാവികള്‍ മനസ് മടുത്ത് വോട്ടെടുപ്പില്‍ നിന്നും പിന്മാറിയതാണ് പോളിങ് കുറയാന്‍ കാരണം.
ദേശീയതലത്തില്‍ കോണ്‍ഗ്രസും സിപിഎമ്മും കൈകോര്‍ത്തത് അംഗീകരിക്കാന്‍ അവരുടെ പ്രവര്‍ത്തകര്‍ക്ക് പോലും കഴിഞ്ഞിട്ടില്ല. പിണറായി സര്‍ക്കാരിന്റെ ജനദ്രോഹനയങ്ങളും പ്രതിപക്ഷത്തിന്റെ അതിനോടുള്ള സമീപനവും ഇരു മുന്നണിയിലുള്ളവരെ മാറി ചിന്തിക്കാന്‍ പ്രേരിപ്പിച്ചു. എന്‍ഡിഎ പ്രവര്‍ത്തകര്‍ക്ക് തങ്ങളുടെ പ്രവര്‍ത്തകരെ പോളിങ് ബൂത്തിലെത്തിക്കാന്‍ സാധിച്ചുവെന്നും കെ. സുരേന്ദ്രന്‍ പറഞ്ഞു.
ദേശീയതലത്തില്‍ കോണ്‍ഗ്രസ് തിരിച്ചുവരാന്‍ സാധ്യതയില്ലാത്തതും പോളിങ്ങിനെ സ്വാധീനിച്ചിട്ടുണ്ട്. സിപിഎം-കോണ്‍ഗ്രസ് ശക്തികേന്ദ്രങ്ങളില്‍ പോളിങ് വളരെ കുറവായിരുന്നു. അവിശുദ്ധ രാഷ്‌ട്രീയത്തിന്റെ തിരിച്ചടിയാണിതെന്നും സുരേന്ദ്രന്‍ പറഞ്ഞു.
