വാഷിങ്ടണ്‍: ചന്ദ്രനില്‍ സെല്ലുലാര്‍ കണക്ടിവിറ്റി എത്തിക്കാന്‍ അമേരിക്കയുടെ ബഹിരാകാശ ഗവേഷണ ഏജന്‍സിയായ നാസ ഒരുങ്ങുന്നു. നോക്കിയയുമായി ചേര്‍ന്നാണ് ഈ സംവിധാനമൊരുക്കുക.
സ്പേസ് എക്സ് ഈ വര്‍ഷം നടത്താനിരിക്കുന്ന വിക്ഷേപണത്തില്‍ ചന്ദ്രനിലേക്കുള്ള 4ജി നെറ്റ് വര്‍ക്ക് ഉപകരണങ്ങളും വിക്ഷേപിക്കും. ലാന്‍ഡര്‍ ഉപയോഗിച്ച് ചന്ദ്രന്റെ ദക്ഷിണ ധ്രുവത്തില്‍ 4ജി സംവിധാനം സ്ഥാപിക്കും. ഭൂമിയില്‍ നിന്ന് നിയന്ത്രിക്കാവുന്ന സംവിധാനമാണിത്.
ഒരു ടെക്നിഷ്യന്റെ സഹായമില്ലാതെ സ്ഥാപിക്കാനാകുന്ന ഉപകരണം നിര്‍മിക്കുക എന്നതാണ് ഒരു നെറ്റ് വര്‍ക്ക് സ്ഥാപിക്കുന്നതിലെ ആദ്യ വെല്ലുവിളിയെന്ന് നാസയുടെ സ്പേസ് ടെക്നോളജി മിഷന്‍ ഡയറക്ടറേറ്റിലെ പ്രോഗ്രാംസ് ഡെപ്യൂട്ടി അസോസിയേറ്റ് അഡ്മിനിസ്ട്രേറ്റര്‍ വാള്‍ട്ട് ഇംഗ്ലണ്ട് പറഞ്ഞു.
കടുത്ത താപനിലയേയും വികിരണത്തേയും കഠിനമായ ചന്ദ്ര പരിതസ്ഥിതിയേയും അതിജീവിച്ച് അത് പ്രവര്‍ത്തിക്കേണ്ടതുണ്ടെന്നും അദ്ദേഹം പറഞ്ഞു.
നോക്കിയയുടെ ബെല്‍ ലാബ്സ് ആണ് 4ജി നെറ്റ് വര്‍ക്ക് വികസിപ്പിച്ചത്. യുഎസ് കമ്പനിയായ ഇന്റൂയിറ്റീവ് മെഷീന്‍സ് നിര്‍മിച്ച ലാന്‍ഡറിലാണ് ഇത് ചന്ദ്രനിലെത്തിക്കുക. ലാന്‍ഡറും റോവറുകളും തമ്മിലുള്ള ആശയിവിനിമയത്തിന് വേണ്ടിയാണ് ഈ നെറ്റ് വര്‍ക്ക് ഉപയോഗിക്കുക.
ചന്ദ്രനിലെ മഞ്ഞിന്റെ സാന്നിധ്യം കണ്ടെത്താന്‍ വേണ്ടിയുള്ള ലൂണാര്‍ ഔട്ട്പോസ്റ്റ് റോവര്‍, മൈക്രോ- നോവ ഹോപ്പര്‍ എന്നീ രണ്ട് ഉപകരണങ്ങളാണ് ഇന്റൂയിറ്റീവ് മെഷീന്‍സ് ലാന്‍ഡറില്‍ ചന്ദ്രനിലെത്തുക.
ഈ ഉപകരണങ്ങള്‍ പകര്‍ത്തുന്ന ചിത്രം അതിവേഗം ഭൂമിയിലേക്കെത്തിക്കാന്‍ 4ജി നെറ്റ് വര്‍ക്കിന്റെ സഹായത്തോടെ ലാന്‍ഡറിലേക്കും അതില്‍ നിന്ന് ഭൂമിയിലേക്കും അതിവേഗം എത്തിക്കാനാവും.
പ്രതികരിക്കാൻ ഇവിടെ എഴുതുക: