ന്യൂദല്‍ഹി: മുന്‍ ഡിജിപി ജേക്കബ് തോമസിനെതിരായ ഡ്രഡ്ജര്‍ അഴിമതി ആരോപണ കേസില്‍ അന്വേഷണം പൂര്‍ത്തിയാക്കാന്‍ കൂടുതല്‍ സമയം ആവശ്യപ്പെട്ട് കേരളം. മൂന്നു മാസത്തെ സമയം കൂടി വേണമെന്നാണ് സുപ്രീംകോടതിയില്‍ വിജിലന്‍സ് സമര്‍പ്പിച്ച സത്യവാങ്മൂലത്തില്‍ ആവശ്യപ്പെട്ടിരിക്കുന്നത്.
ഡച്ച് കമ്പനിയായ ഐഎച്ച്സി ബീവെറിനെ കുറിച്ചുള്ള വിവരങ്ങള്‍ തേടി കേന്ദ്ര ആഭ്യന്തര മന്ത്രാലയത്തെ സമീപിച്ചതായും മറുപടിക്കായി കാത്തിരിക്കുകയാണെന്നും സത്യവാങ്മൂലത്തിലുണ്ട്. അന്വേഷണം ഇഴയുന്നതില്‍ സുപ്രീം
കോടതി അതൃപ്തി അറിയിച്ചിരുന്നു. അന്വേഷണം സംബന്ധിച്ച തല്‍സ്ഥിതി റിപ്പോര്‍ട്ട് മുദ്രവെച്ച കവറില്‍ കൈമാറിയതിനു പിന്നാലെയായിരുന്നു കോടതിയുടെ വിമര്‍ശനം.
അന്വേഷണം പൂര്‍ത്തിയാക്കാന്‍ കൂടുതല്‍ സമയം അനുവദിക്കരുതെന്ന് അഭിഭാഷകന്‍ മുഖേന ഫയല്‍ ചെയ്ത സത്യവാങ്മൂലത്തില്‍ ജേക്കബ് തോമസ് ആവശ്യപ്പെട്ടു. മൂന്നു വര്‍ഷവും ഏഴു മാസവും 19 ദിവസവും നീണ്ട അന്വേഷണം നടത്തിയിട്ടും വിജിലന്‍സിന് ഒരു തെളിവും കണ്ടെത്താന്‍ കഴിഞ്ഞിട്ടില്ലെന്നും ജേക്കബ് തോമസ് ചൂണ്ടിക്കാട്ടുന്നു.
പ്രതികരിക്കാൻ ഇവിടെ എഴുതുക: