ആലപ്പുഴ: പൂങ്കാവില്‍ സഹോദരിയെ സഹോദരന്‍ തലയ്‌ക്കടിച്ച് കൊലപ്പെടുത്തിയ ശേഷം വീട്ടുവളപ്പില്‍ കുഴിച്ചിട്ട സംഭവം നാടിനെ നടുക്കി. പോലീസ് വീട്ടിലെത്തിയപ്പോഴാണ് അയല്‍വാസികള്‍ പോലും സംഭവം അറിയുന്നത്. മാരാരിക്കുളം തെക്ക് പഞ്ചായത്ത് പന്ത്രണ്ടാം വാര്‍ഡില്‍ പൂങ്കാവ് വടക്കന്‍പറമ്പില്‍ റോസമ്മ (61) ആണ് മരിച്ചത്. സഹോദരന്‍ ബെന്നിയെ (63) ആലപ്പുഴ നോര്‍ത്ത് പോലീസ് അറസ്റ്റ് ചെയ്തു.
സഹോദരനുമായി ഒരുമിച്ച് കഴിഞ്ഞിരുന്ന റോസമ്മയെ കഴിഞ്ഞ 17 മുതലാണ് കാണാതായത്. ഫോണില്‍ വിളിച്ചിട്ടും ലഭിക്കാതെ വന്നതോടെ ബന്ധുക്കള്‍ അന്വേഷണം തുടങ്ങി. ഇതിനിടെ തനിക്കൊരു അബദ്ധം പറ്റിയെന്നും റോസമ്മ ഇനി തിരികെ വരില്ലെന്നും ഇന്നലെ രാവിലെ ബെന്നി സഹോദരന്റെ വീട്ടിലെത്തി അറിയിച്ചതിനെത്തുടര്‍ന്നാണ് നാടിനെ ഞെട്ടിച്ച കൊലപാതകത്തിന്റെ ചുരുള്‍ അഴിയുന്നത്.
ബന്ധുക്കള്‍ വിവരം അറിയച്ചതിനെ തുടര്‍ന്ന് നോര്‍ത്ത് പോലീസ് സ്ഥലത്തെത്തിയപ്പോള്‍ ചെട്ടികാട് ജങ്ഷനിലെ ചായക്കടയില്‍ യാതൊരു കൂസലും ഇല്ലാതെ ബെന്നി ചായക്കുടിക്കുകയായിരുന്നു. വളരെ സ്‌നേഹത്തില്‍ കഴിഞ്ഞ ബെന്നി സഹോദരിയെ ഇത്തരത്തില്‍ നിഷ്ഠൂരമായി കൊന്ന് വീട്ടുവളപ്പില്‍ കുഴിച്ചിടുമെന്ന് നാട്ടുകാര്‍ക്ക് ആദ്യം വിശ്വസിക്കാനായില്ല. പിന്നീട് ബെന്നി ചൂണ്ടിക്കാട്ടിയിടത്ത് പോലീസ് സാന്നിദ്ധ്യത്തില്‍ കുഴിച്ചപ്പോള്‍ മൃതദേഹം കണ്ടുകിട്ടിയതോടെയാണ് ഏവര്‍ക്കും വിശ്വാസമായത്.
ബെന്നിയുടെ ഭാര്യ വര്‍ഷങ്ങള്‍ക്ക് മുമ്പ് മരിച്ചു. റോസമ്മയ്‌ക്കും ഭര്‍ത്താവില്ല. ഇവരുവര്‍ക്കും മക്കളുണ്ടെങ്കിലും വിവാഹം കഴിച്ച് മാറി താമസിക്കുകയാണ്. റോസമ്മ ചമ്പക്കുളം സ്വദേശിയുമായി വിവാഹം കഴിക്കുന്നതിനുള്ള തീരുമാനത്തിലായിരുന്നു. ഇത് ബെന്നി അംഗീകരിച്ചില്ലെന്നും ഇത് സംബന്ധിച്ച് തര്‍ക്കങ്ങള്‍ ഉണ്ടായെന്നും പറയപ്പെടുന്നു. വാക്കുതര്‍ക്കത്തിനിടെ ചുറ്റിക കൊണ്ട് തലയ്‌ക്കടിച്ച് കൊലപ്പെടുത്തുകയായിരുന്നു.
പ്രതികരിക്കാൻ ഇവിടെ എഴുതുക: