പാറശ്ശാല: കേരള -തമിഴ്നാട് അതിർത്തി പ്രദേശമായ പാറശ്ശാലയിൽ ബിജെപി തമിഴ്നാട് ഘടകം അധ്യക്ഷൻ അണ്ണാ മലൈയുടെ കാടിളക്കി പ്രചാരണം. റോഡ്ഷോയ്ക്കെത്തിയ അണ്ണാമലൈയെ കാണാൻ ആയിരങ്ങളാണ് എത്തിയത്. രാത്രി 7.45 നാണ് കുന്നത്തുകാലിലെ വണ്ടിത്തടത്ത് റോഡ് ഷോ ആരംഭിക്കുന്നതിനായി അണ്ണാമലൈ എത്തിയത്. വാഹനത്തിൽ എൽ ഡി എ സ്ഥാനാർത്ഥി രാജീവ് ചന്ദ്രശേഖറിനൊപ്പം വോട്ടഭ്യർത്ഥിച്ച അണ്ണാമലൈയെ പുഷ്പപവൃഷ്ടിയോടെയാണ് പ്രവർത്തകർ വരവേറ്റത്.
കാത്തു നിന്ന സ്ത്രീകളും കുട്ടികളുമടക്കമുള്ള പുരുഷാരത്തിന് നടുവിലൂടെ പ്രചാരണ വാഹനത്തിലേയ്ക്ക് നടന്നു കയറുമ്പോൾ ഹസ്തദാനം ചെയ്യാനെത്തിയവരുടെ തിക്കിത്തിരക്കായിരുന്നു.പാറശ്ശാലയുടെ ഗ്രാമവീഥികളെ ഞായറാഴ്ച വൈകുന്നേരം അക്ഷരാർത്ഥത്തിൽ ഉത്സവ പ്രതീതിയിലാഴ്ത്തുന്നതായിരുന്നു റോഡ് ഷോ.
കുന്നത്തുകാൽ പഞ്ചായത്തിലെ വണ്ടിടത്തത്തുനിന്നും ആരംഭിച്ച റോഡ് ഷോ കൊല്ലയിൽ പഞ്ചായത്തിലെ മഞ്ചവിളാകം, പെരുങ്കടവിള പഞ്ചായത്തിലെ മാരായമുട്ടം , പെരുങ്കടവിളയിലും എത്തിയ ശേഷം പാലിയോട്, കുന്നത്തുകാൽ കാരക്കോണം എന്നിവിടങ്ങളിലൂടെ തമിഴ്നാട് അതിർത്തിയായ കന്നുമാമുട്ടിലെത്തി യപ്പോൾ ആവേശം അണപൊട്ടി. മണ്ഡലത്തിലെ പ്രവർത്തകർക്കൊപ്പം തമിഴ്നാട്ടിലെ ബി ജെ പി പ്രവർത്തകരും അണ്ണാമലൈയെ സ്വീകരിക്കാൻ തടിച്ചു കൂടി.
സ്വതസിദ്ധമായ ശൈലിയിൽ കൈവീശി റോഡ് ഷോ മുന്നേറിയപ്പോൾ ആവേശം അലകടലായി. അതിർത്തിയിലെ പളുകലും കടന്ന് പാറശ്ശാല ടൗണിൽ എത്തിയ റോഡ് ഷോയ്ക്ക് ദേശീയ പാതയിൽ പാറശ്ശാല മുതൽ അമരവിള വരെ ഇരുചക്രവാഹനങ്ങളിൽ വൻ ജനാവലിയാണ് അകമ്പടിയെത്തിയത് .തമിഴകത്തിന്റെ പുത്തൻ താരോദയം അനന്തപുരിയുടെ രാജീവിനായി വോട്ട് തേടിയപ്പോൾ അക്ഷരാർത്ഥത്തിൽ കാടിളക്കി പ്രചാരണം എന്ന വാക്ക് അന്വർത്ഥമാകുകയായിരുന്നു
