വിഴിഞ്ഞം: മോദി ഭരണത്തിന്റെ വികസന പ്രവര്‍ത്തനങ്ങള്‍ ക്യാന്‍വാസില്‍ പകര്‍ത്തി ആര്‍ട്ടിസ്റ്റ് വിഷ്ണു നാരായണന്‍. അക്രിലിക് ചായം പൂശിയാണ് മോദിയുടെ വികസനം ചിത്രങ്ങളാക്കിയത്. എന്‍ഡിഎ സ്ഥാനാര്‍ത്ഥി രാജീവ് ചന്ദ്രശേഖറിന് കൈമാറാനാണ് അടിയന്തരമായി ചിത്രങ്ങള്‍ തയ്യാറാക്കിയത്.
സന്തോഷത്തോടെ ചിത്രങ്ങള്‍ ഏറ്റുവാങ്ങിയ സ്ഥാനാര്‍ത്ഥി ആദരവോടെ ആര്‍ട്ടിസ്റ്റിനെ ഷാള്‍ അണിയിച്ചു. വിനോദസഞ്ചാര മേഖലയായ കോവളത്ത് നടന്ന മണ്ഡല പര്യടനത്തിനിടയിലാണ് വ്യത്യസ്തമായ സമ്മാനവും സ്വീകരണവും ലഭിക്കുന്നത്. വാഹന പര്യടനം വിഴിഞ്ഞം കല്ലുവെട്ടാന്‍കുഴി ജംഗ്ഷനില്‍ എത്തിയപ്പോഴാണ് അവിടെ കാത്തുനിന്ന വിഷ്ണു നാരായണന്‍ ക്യാന്‍വാസ് ചിത്രം കൈമാറിയത്.
10 വര്‍ഷത്തിനിടെ രാജ്യത്ത് നടന്ന കല, സംസ്‌കാരം, വിനോദം, കാര്‍ഷിക പുരോഗതി എന്നിവയെ കോര്‍ത്തിണക്കിയ വികസന ഛായാചിത്രങ്ങളാണ് ക്യാന്‍വാസില്‍ പകര്‍ത്തിയത്. മോദിയുടെ വികസന കാഴ്ചപ്പാട് ക്യാന്‍വാസിലാക്കിയ ചിത്രം മോദിക്ക് കൈമാറുമെന്നും ഇത്തരം കലാകാരന്‍മാര്‍ ഉയര്‍ന്ന് വരേണ്ടത് രാജ്യത്ത് ആവശ്യമാണെന്നും രാജീവ് ചന്ദ്രശേഖര്‍ പറഞ്ഞു.
പ്രതികരിക്കാൻ ഇവിടെ എഴുതുക: