പാലക്കാട്: പട്ടാമ്പിയില് റോഡരികില് യുവതിയെ തീകൊളുത്തി കൊന്ന ശേഷം യുവാവ് ആത്മഹത്യ ചെയ്തു. കാങ്ങാട്ടുപടി സ്വദേശി പ്രിവിയ (30)യുടെ മൃതദേഹമാണ് പാലക്കാട് പട്ടാമ്പി കൊടുമുണ്ടയ്ക്ക് സമീപം കത്തിക്കരിഞ്ഞ നിലയില് കണ്ടത്.ഈ മാസം 29 ന് യുവതിയുടെ വിവാഹം നിശ്ചയിച്ചിരുന്നു.
യുവതിയെ ആക്രമിച്ച തൃത്താല ആലൂര് സ്വദേശിയായ സന്തോഷ് ജീവനൊടുക്കി. കൊലപാതകത്തിന് ശേഷം ആത്മഹത്യയ്ക്ക് ശ്രമിച്ച സന്തോഷിനെ അതി ഗുരുതരാവസ്ഥയില് എടപ്പാളിലെ ആശുപത്രിയില് പ്രവേശിപ്പിച്ചെങ്കിലും മരിച്ചു. ഇരുവരും തമ്മില് അടുപ്പത്തിലായിരുന്നുവെന്നും എന്നാല് പ്രിവിയ പ്രണയത്തില് നിന്നും പിന്മാറി മറ്റൊരാളെ വിവാഹം കഴിക്കാന് തീരുമാനിച്ചതാണ് കൊലപാതകത്തിന് സന്തോഷിനെ പ്രേരിപ്പിച്ചതെന്നുമാണ് സംശയം.
ഞായറാഴ്ച രാവിലെ പ്രിവിയയുടെ ജഡത്തിന് സമീപത്തായി ഇരുചക്രവാഹനവും കണ്ടെത്തിയിരുന്നു. ഹോണ്ട ഡിയോ സ്കൂട്ടര് നിലത്ത് മറിഞ്ഞുകിടക്കുന്ന നിലയിലായിരുന്നു. വയലിനോട് ചേര്ന്ന് റോഡരികിലാണ് മൃതദേഹം കണ്ടത്. പ്രദേശത്ത് പുല്ല് കത്തിക്കരിഞ്ഞ നിലയിലാണ്.
കൊല്ലപ്പെട്ടയാളെ തിരിച്ചറിഞ്ഞതിന് പിന്നാലെ നടത്തിയ അന്വേഷണത്തിലാണ് അക്രമി സന്തോഷാണെന്നും ഇയാള് ജീവനൊടുക്കാന് ശ്രമിച്ചുവെന്നും മനസിലായത്.
നേരത്തെ മറ്റൊരാളെ വിവാഹം ചെയ്ത പ്രിവിയ പിന്നീട് ഈ ബന്ധം ഒഴിഞ്ഞിരുന്നു. ഇതിന് ശേഷമാണ് പ്രിവിയ സന്തോഷുമായി അടുപ്പത്തിലായത്. തന്നെ വിവാഹം കഴിക്കണമെന്ന് സന്തോഷ് പ്രിവിയയെ നിര്ബന്ധിച്ചെങ്കിലും പ്രിവിയ തയാറാകാതെ ബന്ധത്തില് നിന്ന് പിന്മാറുകയായിരുന്നു. തുടര്ന്ന് മറ്റൊരാളുമായി വിവാഹം നിശ്ചയിച്ചിരിക്കെയാണ് കൊലപാതകം.
