കൊച്ചി : മള്ട്ടിപ്ലക്സ് തിയേറ്റര് ശൃംഖലയായ പിവിആര് സിനിമയും മലയാള സിനിമാ സംഘടനകളും തമ്മിലുളള തര്ക്കം പരിഹരിച്ചു.മലയാള സിനിമകള് തുടര്ന്നും പ്രദര്ശിപ്പിക്കാന് പി.വി.ആര് സമ്മതിച്ചു എന്നാണ് അറിയുന്നത്.
സിനിമാ സംഘടനകളും പിവിആര് അധികൃതരും ഓണ്ലൈനായി നടത്തിയ ചര്ച്ചയിലാണ് തീരുമാനം.പ്രശ്ന പരിഹാരത്തിനായി വിര്ച്വല് പ്രിന്റ് വിഷയത്തില് പിവിആറും പ്രൊഡ്യൂസേഴ്സ് അസോസിയേഷനുമായുള്ള ചര്ച്ചകള് നടന്നുവരികയായിരുന്നു.
പിവിആര് തീരുമാനം മാറ്റിയില്ലെങ്കില് ഭാവിയില് മൊഴിമാറ്റ ചിത്രങ്ങള് അടക്കം പ്രദര്ശിപ്പിക്കാന് അനുമതി നല്കില്ലെന്ന് സാങ്കേതിക വിദഗദ്ധരുടെ സംഘടന ഫെഫ്ക നിലപാട് എടുത്തിരുന്നു.
പിവിആര് ഗ്രൂപ്പിന്റെ സ്ക്രീനുകളില് മലയാള സിനിമകള് പ്രദര്ശിപ്പിക്കാത്തിന് എതിരെ ഫെഫ്ക രംഗത്ത് വന്നിരുന്നു. പി.വി.ആറിന്റെ നിലപാടിനെ തെരുവില് ചോദ്യം ചെയ്യുമെന്ന് ഫെഫ്ക ജനറല് സെക്രട്ടറി ബി. ഉണ്ണിക്കൃഷ്ണന് പറഞ്ഞിരുന്നു. പ്രദര്ശനം നിറുത്തിയതിനെ തുടര്ന്നുണ്ടായ നഷ്ടം നികത്താതെ മലയാള സിനിമകള് ഇനി പി.വി.ആറിന്റെ തിയേറ്ററുകളില് പ്രദര്ശിപ്പിക്കില്ലെന്നും ഫെഫ്ക വെളിപ്പെടുത്തി. ഇതിന് പിന്നാലെയാണ് പി.വി.ആര് നിലപാട് മാറ്റിയത്.
പിവിആറും നിര്മാതാക്കളും തമ്മില് ഡിജിറ്റല് കണ്ടന്റ് പ്രൊഡക്ഷന് സംബന്ധിച്ച തര്ക്കമാണ് സിനിമകളുടെ പ്രദര്ശനം നിര്ത്തിവെക്കുന്നതിലേക്ക് എത്തിയത്. തിയേറ്ററുകളിലേക്ക് ഡിജിറ്റല് കണ്ടന്റ് എത്തിക്കുന്ന ക്യൂബ് അടക്കമുള്ള കമ്പനികള് വലിയ വിര്ച്വല് പ്രിന്റ് ഫീ ഈടാക്കുന്നതിനാല് നിര്മ്മാതാക്കളുടെ സംഘടനയായ കേരള ഫിലിം പ്രൊഡ്യൂസേഴ്സ് അസോസിയേഷന് മുന്കൈയെടുത്ത് കണ്ടന്റ് മാസ്റ്ററിംഗ് യൂണിറ്റ് തുടങ്ങിയിരുന്നു.വന്തുക നല്കുന്നത് ഒഴിവാക്കാന് നിര്മാതാക്കള് സ്വന്തമായി ഇതിനുള്ള സംവിധാനം ഒരുക്കിയത് അംഗീകരിക്കാന് തയ്യാറാകാത്തതാണ് തര്ക്കത്തിന് കാരണം.
