തിരുവനന്തപുരം: സ്കൂളുകളില് കളിസ്ഥലങ്ങള് നിര്ബന്ധമാണെന്ന് ഹൈക്കോടതി. കളി സ്ഥലങ്ങളില്ലാത്ത സ്കൂളുകള്ക്കെതിരെ കേരള വിദ്യാഭ്യാസ ചട്ട പ്രകാരം ശക്തമായി നടപടി സ്വീകരിക്കണമെന്ന് ഹൈക്കോടതി സിംഗിള് ബെഞ്ച് നിര്ദ്ദേശിച്ചു.
സ്കൂളുകള് അടച്ചുപൂട്ടുന്നത് അടക്കമുള്ള നടപടികള് സ്വീകരിക്കാനാണ് ജസ്റ്റിസ് പി വി കുഞ്ഞികൃഷ്ണന് സര്ക്കാരിന് നിര്ദ്ദേശം നല്കിയത്. സ്കൂളുകളില് കളിസ്ഥലങ്ങള് എത്ര അളവില് വേണം എന്നതിനെക്കുറിച്ച് സര്ക്കാര് മാര്ഗനിര്ദേശങ്ങള് പുറത്തിറക്കണം. നാലുമാസത്തിനകം മാര്ഗനിര്ദേശങ്ങള് പുറത്തിറക്കാനാണ് നിര്ദ്ദേശം .
കൊല്ലം തെവായൂര് ഗവണ്മെന്റ് വെല്ഫെയര് എല് പി സ്കൂളില് കളിസ്ഥലത്ത് കുടിവെളള ടാങ്ക് നിര്മ്മിക്കുന്നത് ചോദ്യം ചെയ്തു പിടിഎ പ്രസിഡന്റ് നല്കിയ ഹര്ജി പരിഗണിക്കുകയായിരുന്നു കോടതി. വാട്ടര് ടാങ്ക് നിര്മ്മാണം പിന്നീട് ഉപേക്ഷിച്ചതിനെ തുടര്ന്ന് ഹര്ജി തീര്പ്പാക്കി.
