തിരുവനന്തപുരം: മുഖ്യമന്ത്രി പിണറായി വിജയനും മകള് വീണയ്ക്കുമെതിരായ മാസപ്പടി ഹര്ജിയിലെ വിധി പറയല് വിജിലന്സ് കോടതി ഈ മാസം 19 ലേക്ക് മാറ്റി. കേസില് കോടതി നേരിട്ട് അന്വേഷണം നടത്തണമെന്ന മാത്യൂ കുഴല്നാടന് എംഎല്എയുടെ ഹര്ജി പിന്നീട് പരിഗണിക്കും.
വിജിലന്സ് കോടതിയില് നല്കിയ ഹര്ജിയില് വിജിലന്സ് അന്വേഷണത്തിന് ഉത്തരവിടണമെന്നായിരുന്നു മാത്യൂ കുഴല്നാടന്റെ ആവശ്യം. കഴിഞ്ഞ ദിവസം ഹര്ജി പരിഗണിച്ചപ്പോള് മാത്യൂ നിലപാടു മാറ്റി. തെളിവു കൈമാറാമെന്നും കോടതി തന്നെ കേസ് അന്വേഷിക്കണമെന്നും ആവശ്യപ്പെട്ടു. ഇതോടെ കോടതി വേണോ വിജിലന്സ് വേണോയെന്നു ഹര്ജിക്കാരന് ആദ്യം തീരുമാനിക്കണമെന്നു കോടതി നിര്ദേശിച്ചു. കോടതി മതിയെന്നു മാത്യൂവിന്റെ അഭിഭാഷകന് അറിയിച്ചതോടെ കേസ് 12 ലേക്കു മാറ്റി.
സിഎംആര്എലിനു മുഖ്യമന്ത്രി നല്കിയ വഴിവിട്ട സഹായത്തിന്റെ പ്രതിഫലമാണ് മകള് വീണാ വിജയനു സിഎംആര്എല്ലില് നിന്നു മാസപ്പടിയായി ലഭിച്ചതെന്നാണ് ഹര്ജിയിലെ മാത്യൂ കുഴല്നാടന്റെ ആരോപണം. വിജിലന്സിനെ സമീപിച്ചെങ്കിലും അന്വേഷിക്കാന് തയാറായില്ലെന്നും കോടതി ഇടപെട്ട് അന്വേഷണത്തിന് ഉത്തരവിടണമെന്നുമായിരുന്നു ആദ്യ ആവശ്യം. കോടതി ഇതില് വിധി പറയാനിരിക്കെയാണു മാത്യൂ നിലപാടു മാറ്റിയത്. തെളിവു കൈമാറാമെന്നും കോടതി തന്നെ കേസ് അന്വേഷിക്കണമെന്നും ആവശ്യപ്പെടുകയായിരുന്നു.
