കിളിമാനൂര്‍: കേന്ദ്രമന്ത്രിയും ആറ്റിങ്ങല്‍ പാര്‍ലമെന്റ് മണ്ഡലത്തിലെ എന്‍ഡിഎ സ്ഥാനാര്‍ത്ഥിയുമായ വി. മുരളീധരന് നേരെ ആക്രമണം നടത്തിയ മൂന്നു സിപിഎം പ്രവര്‍ത്തകരെ പള്ളിക്കല്‍ പോലീസ് അറസ്റ്റ് ചെയ്ത് സ്റ്റേഷന്‍ ജാമ്യത്തില്‍ വിട്ടയച്ചു. നിസാര വകുപ്പുകള്‍ ചുമത്തിയാണ് ഇവരെ വിട്ടയച്ചത്.
പള്ളിക്കല്‍ പകല്‍ക്കുറി കൊട്ടിയംമുക്ക് കിളിത്തട്ട് മുകളില്‍ സജീര്‍ (31), പകല്‍ക്കുറി കൊട്ടിയംമുക്ക് തിരുവോണത്തില്‍ അഖില്‍ (30), പകല്‍ക്കുറി കൊട്ടിയംമുക്ക് ചരിവിള പുത്തന്‍ വീട്ടില്‍ ഷാ എന്ന മുഹമ്മദ് ഷാ (28) എന്നിവരെയാണ് വിട്ടയച്ചത്. സംഘം ചേര്‍ന്നുള്ള കലാപശ്രമം, മാര്‍ഗതടസ്സം സൃഷ്ടിക്കല്‍, അസഭ്യം പറയല്‍ തുടങ്ങിയ കുറ്റങ്ങളാണ് ചുമത്തിയിട്ടുള്ളത്.
ബുധനാഴ്ച രാത്രി വി. മുരളീധരന്റെ തെരഞ്ഞെടുപ്പ് പര്യടന വാഹനറാലിക്കിടയില്‍ പള്ളിക്കല്‍ പകല്‍ക്കുറി കൊട്ടിയം മുക്കില്‍വച്ച് നുഴഞ്ഞുകയറി ബൈക്കിലെത്തിയ മൂന്നംഗ സംഘം അസഭ്യം പറയുകയും ആക്രമണം നടത്തുകയുമായിരുന്നു. ബിജെപി നാവായിക്കുളം മണ്ഡലം പ്രസിഡന്റിന്റെ പരാതിയിലാണ് പള്ളിക്കല്‍ പോലീസ് കേസ് എടുത്തത്. കേന്ദ്രമന്ത്രിയായ സ്ഥാനാര്‍ത്ഥിക്ക് നേരെ ആക്രമണം ഉണ്ടായ സാഹചര്യത്തില്‍ പോലീസ് സുരക്ഷ വര്‍ധിപ്പിച്ചിട്ടുണ്ട്.
പ്രതികരിക്കാൻ ഇവിടെ എഴുതുക