തിരുവനന്തപുരം: എന്‍ഡിഎ ആറ്റിങ്ങല്‍ സ്ഥാനാര്‍ത്ഥിയും കേന്ദ്രമന്ത്രിയുമായ വി.മുരളീധരന്റെ വാഹന ജാഥയ്‌ക്ക് നേരെ നടന്ന സിപിഎം അക്രമം പ്രതിഷേധാര്‍ഹമാണെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍.
പരാജയഭീതി പൂണ്ട സിപിഎം അക്രമം അഴിച്ചുവിടുകയാണെന്നും അദ്ദേഹം പ്രസ്താവനയില്‍ പറഞ്ഞു. പള്ളിക്കല്‍ കുത്തിക്കാട് വെച്ച് നടന്ന അതിക്രമം കാരണം വാഹനപര്യടനം നിര്‍ത്തിവെക്കേണ്ടി വന്നു. പ്രവര്‍ത്തകരെ കൈയേറ്റം ചെയ്യാനും ശ്രമമുണ്ടായി.
സംഭവത്തെ കുറിച്ച് സമഗ്രമായ അന്വേഷണം നടത്തണമെന്നും കുറ്റക്കാര്‍ക്ക് അര്‍ഹമായ ശിക്ഷ ലഭിക്കണമെന്നും അദ്ദേഹം പറഞ്ഞു.
നിര്‍ഭയമായും സുഗമമായും പ്രചാരണം നടത്താനുള്ള അവസരമൊരുക്കാന്‍ പൊലീസ് തയാറാവണമെന്ന് മുരളീധരന് ആവശ്യപ്പെട്ടു. സ്വതന്ത്രവും നിഷ്പക്ഷവുമായ തിരഞ്ഞെടുപ്പ് ജനാധിപത്യത്തിന്റെ കരുത്താണെന്ന് ആരും മറക്കരുതെന്ന് അദ്ദേഹം പ്രസ്താവനയില്‍ പറഞ്ഞു.
പള്ളിക്കല്‍ ഗ്രാമപഞ്ചായത്തിലെ പകല്‍ക്കുറി കൊട്ടിയംമുക്കില്‍ വച്ചാണ് വി.മുരളീധരന്റെ പ്രചാരണ വാഹനത്തിന് അടുത്തെത്തിയ ഏതാനും ബൈക്ക് യാത്രികര്‍ അസഭ്യവര്‍ഷം ചൊരിഞ്ഞ് പ്രകോപനം സൃഷ്ടിക്കാന്‍ ശ്രമിച്ചത്. സ്ഥാനാര്‍ഥിക്ക് ഒപ്പമുണ്ടായിരുന്നവര്‍ സംയമനം പാലിച്ചതിനാല്‍ സംഘര്‍ഷം ഒഴിവായി. തുടര്‍ന്ന് പൊലീസ് അകമ്പടിയിലാണ് പ്രചാരണം തുടര്‍ന്നത്
പ്രതികരിക്കാൻ ഇവിടെ എഴുതുക: