ന്യൂദല്‍ഹി: ഇടുക്കി രൂപതയ്‌ക്ക് പിന്നാലെ ‘ദ കേരള സ്റ്റോറി’ പ്രദര്‍ശനവുമായി കൂടുതല്‍ രൂപതകള്‍ രംഗത്തെത്തിയതോടെ പ്രതികരണവുമായി സംവിധായകന്‍ സുദീപ്തോ സെന്‍. കേരള സ്റ്റോറിയെ രാഷ്‌ട്രീയവത്കരിക്കരുതെന്നും രാജ്യത്തെ പെണ്‍മക്കള്‍ക്കൊപ്പം നില്‍ക്കണമെന്നും അദ്ദേഹം എക്‌സില്‍ പോസ്റ്റ് ചെയ്ത കുറിപ്പില്‍ പറയുന്നു.
ദ കേരള സ്റ്റോറി ഭാരത സിനിമയുടെ മിക്കവാറും എല്ലാ റിക്കാര്‍ഡുകളും തകര്‍ത്തു. ഞങ്ങളെ സംബന്ധിച്ചിടത്തോളം ഏറ്റവും പ്രധാനപ്പെട്ട കാര്യം അത് ആഗോളതലത്തില്‍ നിരവധി ഹൃദയങ്ങളെ സ്പര്‍ശിക്കുന്നു എന്നതാണ്. ചിത്രം പുറത്തിറങ്ങി ഒരു വര്‍ഷത്തിന് ശേഷവും ആളുകള്‍ അതിനെക്കുറിച്ച് സംസാരിക്കുന്നു. സാമൂഹ്യശാസ്ത്ര സിദ്ധാന്തങ്ങളുടെയും വാദങ്ങളുടെയും വലിയ നിരയുമായി ആളുകള്‍ വരുന്നു. ഞങ്ങള്‍ ഇപ്പോള്‍ ഈ ചിത്രത്തെ വെറുക്കുന്ന പുതിയ വിഭാഗത്തിന്റെ നിരീക്ഷണത്തിലാണ്. കാരണം നേരത്തേ ദി കേരള സ്റ്റോറിയെ വെറുത്തവരെല്ലാം ഇപ്പോള്‍ ഞങ്ങളുടെ ഏറ്റവും വലിയ ആരാധകരായി മാറിയിരിക്കുന്നു. സങ്കടകരമായ ഭാഗം, നമ്മുടെ സിനിമ കാണാത്ത, എന്നാല്‍ അതിനെ തങ്ങളുടെ രാഷ്‌ട്രീയ രാഷ്‌ട്രീയ ഉപകരണമായി ഉപയോഗിക്കുന്ന ചുരുക്കം രാഷ്‌ട്രീയക്കാരുണ്ടെന്നതാണെന്നും അദ്ദേഹം പറഞ്ഞു.
ദയവു ചെയ്ത് നമ്മുടെ കാലത്തെ ഏറ്റവും പ്രധാനപ്പെട്ട ഒരു സിനിമയെ രാഷ്‌ട്രീയവത്കരിക്കരുത്. നിങ്ങളുടെ രാഷ്‌ട്രീയ പ്രത്യയശാസ്ത്രങ്ങള്‍ പരിഗണിക്കാതെ ഈ സിനിമ കാണാന്‍ ഒരിക്കല്‍ കൂടി എല്ലാവരെയും ക്ഷണിക്കുന്നു. കേരള സ്റ്റോറി കാണുക, നമ്മുടെ രാജ്യത്തെ പെണ്‍മക്കള്‍ക്കൊപ്പം നില്‍ക്കുക, നമ്മുടെ രാജ്യത്തിനെതിരായ ഭീകരതയ്‌ക്കെതിരെ ശക്തമായി സംസാരിക്കുകയെന്നും സുദീപ്തോ സെന്‍ കുറിച്ചു.
പ്രതികരിക്കാൻ ഇവിടെ എഴുതുക: