തിരുവനന്തപുരം : ഹൈക്കോടതി മുന് ചീഫ് ജസ്റ്റിസ് എസ്. മണികുമാറിനെ മനുഷ്യാവകാശ കമ്മീഷന് ചെയര്മാനാക്കാനുളള ശുപാര്ശയില് ഒപ്പുവച്ച് ഗവര്ണര് ആരിഫ് മൊഹമ്മദ് ഖാന്. സംസ്ഥാന സര്ക്കാരിന്റെ ശുപാര്ശ തള്ളണമെന്ന് പ്രതിപക്ഷ നേതാവ് ഗവര്ണര്ക്ക് കത്ത് നല്കിയിരുന്നു.
കഴിഞ്ഞ ഓഗസ്റ്റില് ചേര്ന്ന സെലക്ഷന് കമ്മിറ്റിയിലും ജസ്റ്റിസ് എസ്. മണികുമാറിനെ മനുഷ്യാവകാശ കമ്മീഷന് ചെയര്മാനാക്കാനുളള നീക്കത്തില്
പ്രതിപക്ഷ നേതാവ് വിയോജനക്കുറിപ്പെഴുതിയിരുന്നു. വിവാദങ്ങളെ തുടര്ന്ന് ഏഴുമാസമായി ഗവര്ണര് ശുപാര്ശയില് ഒപ്പുവച്ചിരുന്നില്ല.
ഗവര്ണക്കെതിരെ സുപ്രീംകോടതിയില് സംസ്ഥാന സര്ക്കാര് നല്കിയ ഹര്ജിയിലും ശുപാര്ശ അംഗീകരിക്കാത്ത വിഷയം ചൂണ്ടികാട്ടിയിരുന്നു. തെരഞ്ഞെടുപ്പ് കമ്മീഷന്റെ അംഗീകാരത്തോടെ നിയമന ഉത്തരവ് സര്ക്കാര് പുറത്തിറക്കും.
