കച്ചാര് (അസം): കച്ചാര് ജില്ലയില് നിന്ന് 375 ഗ്രാം ഹെറോയിന് കണ്ടെടുത്ത ശേഷം രണ്ട് മയക്കുമരുന്ന് കടത്തുകാരെ അസം പോലീസ് അറസ്റ്റ് ചെയ്തു. ശനിയാഴ്ച രാത്രി നടത്തിയ ഓപ്പറേഷനിലാണ് മയക്കുമരുന്ന് കടത്താന് ശ്രമിച്ച രണ്ടംഗ സംഘത്തെ പിടികൂടിയത്. പിടിച്ചെടുത്ത മയക്കുമരുന്നിന് രണ്ട് കോടി രൂപ വിലമതിക്കുമെന്നും ഉദ്യോഗസ്ഥര് പറഞ്ഞു.
ധോലായ് പോലീസ് സ്റ്റേഷന് കീഴിലുള്ള ബഗാ ബസാറിലെ ഇസ്ലാമാബാദിലെ മണിപ്പൂരി മാര്ക്കറ്റില് മയക്കുമരുന്ന് കടത്തുന്നതിനെതിരെ ലഭിച്ച രഹസ്യാന്വേഷണത്തിന്റെ അടിസ്ഥാനത്തിലാണ് പോലീസ് ശനിയാഴ്ച വൈകുന്നേരം പ്രത്യേക ഓപ്പറേഷന് നടത്തിയതെന്ന് കച്ചാര് പോലീസ് സൂപ്രണ്ട്, നുമാല് മഹത്ത പറഞ്ഞു.
ഓപ്പറേഷനില് രണ്ട് പേരെ പോലീസ് സംഘം പിടികൂടുകയും 375 ഗ്രാം ഭാരമുള്ള ഹെറോയിന് അടങ്ങിയ 31 സോപ്പ് ബോക്സുകള് ഇവരുടെ പക്കല് നിന്ന് കണ്ടെടുക്കുകയും ചെയ്തതായി എസ്പി നുമാല് മഹത്ത പറഞ്ഞു. എംഡി മൊജിബുര് റഹ്മാന് ബോര്ബുയിയ (27), ഹിരുമോണി ലാസ്കര് (27) എന്നിവരെയാണ് പിടികൂടിയതെന്നും അദ്ദേഹം പറഞ്ഞു. മിസോറാമിലെ ഐസ്വാള് ജില്ലയില് നിന്നാണ് മയക്കുമരുന്ന് അനധികൃതമായി കടത്തുന്നത്.
എന്ഡിപിഎസ് വസ്തുക്കള് പിടിച്ചെടുത്ത് സ്വതന്ത്ര സാക്ഷികളുടെ സാന്നിധ്യത്തില് സ്ഥലത്തുവെച്ചുതന്നെ സീല് ചെയ്തിട്ടുണ്ട്. രണ്ട് കോടിയോളം രൂപയാണ് കരിഞ്ചന്തയില് മയക്കുമരുന്നിന് വില. കൂടുതല് അന്വേഷണം നടന്നുവരികയാണെന്നും എസ്പി മഹത്ത പറഞ്ഞു.
