വീണ്ടും ടിപ്പർ ലോറി ദുരന്തം; ഉറങ്ങിക്കിടന്നയാൾക്ക് മുകളിലൂടെ കയറിയിറങ്ങി

പാലക്കാട്: അയിലൂരിൽ ടിപ്പർ ലോറി കയറി ഉറങ്ങിക്കിടന്നയാൾക്ക് ദാരുണാന്ത്യം. അയിലൂർ പുതുച്ചി കുന്നക്കാട് വീട്ടിൽ രമേഷ് (കുട്ടൻ 45) ആണ് മരിച്ചത്.

ബുധനാഴ്ച പുലർച്ചെ നാലുമണിയോടെയാണ് അപകടം നടന്നത്. വീട് നിർമ്മാണത്തിൻറെ ഭാഗമായി മണ്ണ് തട്ടുന്നതിനായി ലോറി പുറകോട്ട് എടുക്കുമ്പോഴാണ് തറയുടെ ഭാഗത്ത് കിടന്നുറങ്ങുകയായിരുന്ന രമേശിൻറെ ശരീരത്തിലൂടെ ടിപ്പർ ലോറി കയറിയിറങ്ങിയത്. മൃതദേഹം ജില്ലാ ആശുപത്രി മോർച്ചറിയിലേക്ക് മാറ്റിയിട്ടുണ്ട്.

മണ്ണ് കൊണ്ടുവരുന്നതിനെതിരെ കഴിഞ്ഞ ദിവസം പരാതി ഉയർന്നതിനെ തുടർന്നാണ് രാത്രിയിൽ ടിപ്പറിൽ മണ്ണ് കൊണ്ടുവന്നു തള്ളിയത്. പുലർച്ചെ ഇരുട്ടായിരുന്നതിനാൽ അപകടത്തിനുള്ള അവസരമൊരുങ്ങുകയായിരുന്നു.