ഇടുക്കി: കട്ടപ്പനയിലെ ഇരട്ടക്കൊലപാതക കേസിലെ മുഖ്യപ്രതി നീതിഷിനെതിരെ സുഹൃത്തിന്റെ അമ്മയെ ബലാത്സംഗം ചെയ്തതിനും കേസ്. ഗന്ധര്വനാണ് ബലാത്സംഗം ചെയ്യുന്നതെന്ന് വിശ്വസിപ്പിച്ചായിരുന്നു പീഡനം. കസ്റ്റഡി കാലാവധി അവസാനിച്ച പശ്ചാത്തലത്തില് നിതീഷിനെയും കൂട്ടു പ്രതി വിഷ്ണുവിനെയും കോടതിയില് ഹാജരാക്കി റിമാന്ഡ് ചെയ്തു.
ഇരട്ടക്കൊലപാതക കേസിലെ പ്രതികളായ നിതീഷിനെയും വിഷ്ണുവിനെയും കസ്റ്റഡിയില് വാങ്ങി ചോദ്യം ചെയ്തപ്പോഴാണ് ബലാത്സംഗ വിവരം പുറത്തു വന്നത്. 2016 നു ശേഷം സുഹൃത്തിന്റെ അമ്മയെ പലതവണ ബലാത്സംഗം ചെയ്തതായി നിതീഷ് സമ്മതിച്ചു.ഈ സത്രീയുടെ പരാതിയിലാണ് നിതീഷിനെതിരെ കേസെടുത്തത്.പൂജയുടെ ഭാഗമായി ഗന്ധര്വനെത്തുന്നതാണെന്ന് തെറ്റിദ്ധരിപ്പിച്ചാണ് ഇത് ചെയ്തത്. ഇതിനൊപ്പം കെട്ടിട നിര്മ്മാണ സ്ഥലത്തു നിന്നും കമ്പിയും സിമന്റും മോഷ്ടിച്ചതിന് ഇരുവര്ക്കുമെതിരെ മറ്റൊരു കേസുമെടുത്തു.
കട്ടപ്പനയിലും പരിസര പ്രദേശങ്ങളിലും വര്ഷങ്ങളായി മോഷണം നടത്തിയിരുന്നു ഇവര്. നിരവധി കേസുകളുമുണ്ട്.
ആക്രി സാധനങ്ങള് പോലുള്ളവ മോഷ്ടിച്ച് ഇതില് നിന്നും കിട്ടുന്ന തുക ഉപയോഗിച്ചാണിവര് ജീവിച്ചിരുന്നത്. വിജയന്റെ കുടുംബത്തില് എത്തിയ നിതീഷ് എല്ലാവരെയും തനിക്കനുകൂലമായി വശപ്പെടുത്തിയെടുത്തു. വീട്ടില് ഗന്ധര്വന് എത്തുന്നു വിശ്വസിപ്പിക്കാന് പല തന്ത്രങ്ങളും പൂജകളും ഇയാള് നടത്താറുണ്ടായിരുന്നു. നിതീഷിന്റെ കൂടുതല് കുറ്റകൃത്യങ്ങളെ കുറിച്ചറിയാന് കൂട്ടു പ്രതിയായ വിഷ്ണുവിന്റെ അമ്മയെയും സഹോദരിയെയും ഇയാളുടെ സ്വാധീനത്തില് നിന്ന് പുറത്തെത്തിക്കാന് ശ്രമിക്കുകയാണ് പൊലീസ്. ഇതിനായി ഇവര്ക്ക് കൗണ്സിലിംഗ് നല്കി വരികയാണ്.
ഇരട്ടക്കൊലപാതകത്തില് നവജാത ശിശുവിനെ കൊലപ്പെടുത്തിയത് സാഗര ജംഗ്ഷനില് വിജയന്റെ സ്വന്തം വീട്ടില് വച്ചാണെന്ന് നേരത്തെ തന്നെ കണ്ടെത്തിയിരുന്നു. നിതീഷ് എത്തുന്നത് വരെ അയല്ക്കാരും ബന്ധുക്കളുമായി നല്ല ബന്ധത്തിലായിരുന്നു വിജയനും കുടുംബവും. വിജയന്റെ മകള് നന്നായി പഠിക്കുമായിരുന്നു. ഇടക്ക് കൈവേദനയുണ്ടായി. നിതീഷിനെ കണ്ടപ്പോള് കൂടോത്രമാണെന്നും ചില പൂജകള് ചെയ്യണമെന്നും പറഞ്ഞു. ഇതോടെയാണ് വിജയന്റെ കുടുംബവുമായി നിതീഷ് ബന്ധം സ്ഥാപിക്കുന്നത്. വിജയനും കുടുംബാംഗങ്ങള്ക്കും പൂജകളിലും മറ്റും അമിതമായ വിശ്വാസമുണ്ടായിരുന്നു.
ഇതിനിടെ നിതീഷില് നിന്നും പെണ്കുട്ടി ഗര്ഭം ധരിച്ചു.ഇതോടെ കുട്ടിയെ വീട്ടിനുളളിലാക്കി. പ്രസവിച്ച കുഞ്ഞിനെ കൊലപ്പെടുത്തിയ ശേഷമാണ് സ്ഥലം വിറ്റ് ഇവിടെ നിന്നും പോയത്. വാടകക്ക് താമസിച്ച സ്ഥലത്തൊന്നും സ്ത്രീകളെ നിതീഷ് പുറത്തിറക്കാറില്ലായിരുന്നു. സംഭവം പുറത്തറിയുമെന്ന ആശങ്കയിലാണിതെന്നാണ് കരുതുന്നത്. കക്കാട്ടുകടയിലെ വീട്ടിലും ഇതായിരുന്നു സ്ഥിതി. ഇവിടെയും പൂജകള് നടത്തിയ ലക്ഷണങ്ങളുണ്ടായിരുന്നു. നിതീഷിനെ ഭയന്നാണ് എല്ലാവരും കഴിഞ്ഞിരുന്നതെന്നതിനാലാണ് രണ്ടു കൊലപാതകങ്ങളും പുറത്തറിയാതിരുന്നത്.
