തിരുവനന്തപുരം: കഴിഞ്ഞ ദിവസം പനവിളയില് ടിപ്പര് ലോറി അപകടത്തില് മരിച്ച ചാല വെക്കോഷണല് ഹയര് സെക്കന്ഡറി സ്കൂളിലെ അധ്യാപകന് ജിഎസ് സുധീറിന് വിട നല്കി വിദ്യാര്ത്ഥികളും അധ്യാപകരും സുഹൃത്തുക്കളും.സ്കൂളില് പൊതുദര്ശനത്തിന് വച്ച മൃതദേഹത്തില് വിദ്യാര്ത്ഥികളും സഹപ്രവര്ത്തകരും അന്തിമോപചാരം അര്പ്പിച്ചു.
ഇന്ന് വൊക്കേഷണല് ഹയര് സെക്കന്ഡറി പരീക്ഷയ്ക്കായി ലാബ് സജ്ജമാക്കാന് രാവിലെ എത്തുമെന്ന് പറഞ്ഞ് ഇന്നലെ ഇറങ്ങിയതായിരുന്നു സുധീര്.എന്നാല് ചേതനയറ്റ അദ്ദേഹത്തിന്റെ ശരീരമാണ് ഇന്ന് സ്കൂളിലെത്തിച്ചത്.
അധ്യാപക സംഘടനാ പ്രവര്ത്തകനുമായിരുന്നു സുധീര്.പട്ടത്ത് പുതുതായി നിര്മ്മിക്കുന്ന വീട്ടില് പോയി മടങ്ങവെയാണ് അപകടമുണ്ടായത്. മങ്ങാട്ടുകടവിലെ വീട്ടിലും പൊതുദര്ശനത്തിന് വച്ച ശേഷം മൃതദേഹം ശാന്തികവാടത്തില് സംസ്കരിച്ചു. ഡിഎംഒ ഓഫീസിലെ ജീവനക്കാരി സ്മിതയാണ് ഭാര്യ. മൂന്നാം ക്ലാസിലും എട്ടാം ക്ലാസിലും പഠിക്കുന്ന രണ്ടു പെണ്കുട്ടികളുണ്ട്.
