ന്യൂദല്ഹി: രാജ്യവ്യാപകമായി ജാതി സെന്സസ് വേണമെന്ന ആവശ്യത്തെ എതിര്ത്ത് കോണ്ഗ്രസ് നേതാവ് ആനന്ദ് ശര്മ്മ. സ്വത്വ രാഷ്ട്രീയം എന്ന ആശയത്തെ പാര്ട്ടി ഒരിക്കലും അംഗീകരിച്ചിട്ടില്ലെന്നും രാജ്യത്ത് നിലനില്ക്കുന്ന തൊഴിലില്ലായ്മയ്ക്കും അസമത്വത്തിനും ജാതി സെന്സസ് പരിഹാരമല്ലെന്നും അദേഹം പറഞ്ഞു.
ജാതി സെന്സസ് ഇന്ദിരാഗാന്ധിയുടെയും രാജീവ് ഗാന്ധിയുടെയും പൈതൃകത്തെ അവഹേളിക്കുന്നതായി തെറ്റിദ്ധരിക്കുമെന്ന് മാര്ച്ച് 19 ന് കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയ്ക്ക് അയച്ച കത്തില് ആനന്ദ് ശര്മ്മ പറഞ്ഞു.
ജാതി എന്നത് ഇന്ത്യന് സമൂഹത്തിന്റെ ഒരു യാഥാര്ത്ഥ്യമാണെങ്കിലും, കോണ്ഗ്രസ് ഒരിക്കലും സ്വത്വ രാഷ്ട്രീയത്തില് ഏര്പ്പെടുകയോ അംഗീകരിക്കുകയോ ചെയ്തിട്ടില്ല. പ്രദേശങ്ങള്, മതങ്ങള്, ജാതികള്, വംശങ്ങള് എന്നിവയുടെ സമ്പന്നമായ വൈവിധ്യങ്ങളുള്ള ഒരു സമൂഹത്തില് അത് ജനാധിപത്യത്തിന് ഹാനികരമാണ്.
ദേശീയ പാര്ട്ടിയുടെ പ്രതിനിധി എന്ന നിലയില്, ദരിദ്രര്ക്കും അധഃസ്ഥിതര്ക്കും തുല്യതയ്ക്കും സാമൂഹിക നീതിക്കും വേണ്ടിയുള്ള നയങ്ങള് രൂപീകരിക്കുന്നതില് വിവേചനരഹിതമായ ഒരു സമ്പൂര്ണ്ണ സമീപനത്തില് കോണ്ഗ്രസ് വിശ്വസിക്കുന്നു.
1990 ലെ മണ്ഡല് കലാപത്തിന് ശേഷം, പ്രതിപക്ഷ നേതാവെന്ന നിലയില് രാജീവ് ഗാന്ധി ലോക്സഭയില് നടത്തിയ ചരിത്രപരമായ പ്രസംഗത്തില്, ‘നമ്മുടെ രാജ്യത്ത് ജാതീയതയെ പ്രതിഷ്ഠിക്കാന് ജാതിയെ നിര്വചിച്ചാല് നമുക്ക് പ്രശ്നങ്ങളുണ്ട്… പാര്ലമെന്ററി, അസംബ്ലി മണ്ഡലങ്ങളില് ജാതീയത ഒരു ഘടകമാക്കാന് പോകുകയാണെങ്കില് ഞങ്ങള്ക്ക് പ്രശ്നങ്ങളുണ്ട്….. ഈ രാഷ്ട്രം വിഭജിക്കപ്പെടുന്നത് നോക്കിനില്ക്കാന് കോണ്ഗ്രസിന് കഴിയില്ല….’ എന്നും ആനന്ദ് ശര്മ്മ കത്തില് വ്യക്തമാക്കി.
