ജമ്മു: ജമ്മു കശ്മീരിലെ രജൗരി ജില്ലയിൽ നിയന്ത്രണ രേഖയിൽ (എൽഒസി) 34 കാരനായ പാകിസ്ഥാൻ നുഴഞ്ഞുകയറ്റക്കാരനെ അറസ്റ്റ് ചെയ്തതായി സുരക്ഷാ ഉദ്യോഗസ്ഥർ അറിയിച്ചു. പാകിസ്ഥാൻ അധിനിവേശ കശ്മീരിലെ (പിഒകെ) സമാനി ഗ്രാമത്തിൽ താമസിക്കുന്ന മുഹമ്മദ് നദീം ആണ് പിടിയിലായത്.
വെള്ളിയാഴ്ച വൈകിട്ട് അതിർത്തിക്കപ്പുറത്ത് നിന്ന് നദീം ഈ ഭാഗത്തേക്ക് നീങ്ങുമ്പോൾ നൗഷേര സെക്ടറിൽ വച്ച് സൈനികർ തടയുകയായിരുന്നു. ഇയാളിൽ നിന്ന് ആയുധങ്ങൾ ഒന്നും തന്നെ കണ്ടെടുത്തിട്ടില്ല.
സൈന്യം പട്രോളിംഗ് ഡ്യൂട്ടിയിലായിരുന്നപ്പോൾ നിരായുധനായ ഒരു നുഴഞ്ഞുകയറ്റക്കാരനെ ശ്രദ്ധയിൽപ്പെട്ടതായും പിന്നീട് ഒരു ചെറിയ പിന്തുടരലിനുശേഷം പിടികൂടിയതായും സൈന്യം പിന്നീട് പ്രസ്താവനയിൽ പറഞ്ഞു.
