തൃശൂര്‍: ചാലക്കുടിയില്‍ പൊലീസ് ജീപ്പ് തകര്‍ത്ത കേസിലെ പ്രതിയായ ഡിവൈഎഫ്‌ഐ നേതാവ് നിതിന്‍ പുല്ലന്‍ ,പൊലീസിനെതിരെ പരാതിയുമായി രംഗത്തെത്തി.കസ്റ്റഡിയിലെടുത്ത തന്റെ ജീപ്പിന്റെ പെട്രോള്‍ ടാങ്കില്‍ പൊലീസ് കല്ലുപ്പിട്ടന്നാണ് പരാതി. കോടതി നിര്‍ദേശത്തെ തുടര്‍ന്നുള്ള പരിശോധന അട്ടിമറിച്ചെന്നും ആക്ഷേപമുണ്ട്.
ചാലക്കുടി ഗവണ്‍മെന്റ് ഐടിഐ യിലെ തെരഞ്ഞെടുപ്പ് വിജയാഹ്ലാദത്തിനിടെ പൊലീസ് ജീപ്പ് തകര്‍ത്ത സംഭവത്തില്‍ നിതിന്‍ പുല്ലനെ പൊലീസ് കസ്റ്റഡിയിലെടുത്തെങ്കിലും സി പി എം പ്രവര്‍ത്തകര്‍ ബലമായി മോചിപ്പിച്ചിരുന്നു. തുടര്‍ന്ന് ഏറെ ദിവസം കഴിഞ്ഞാണ് ഇയാളെ അറസ്റ്റ് ചെയ്യാന്‍ കഴിഞ്ഞത്.ഇതിന് പിന്നാലെ നിതിന്റെ ജീപ്പും പൊലീസ് കസ്റ്റഡിയില്‍ എടുത്തിരുന്നു. ഈ ജീപ്പിന്റെ പെട്രോള്‍ ടാങ്കില്‍ പൊലീസ് ഉപ്പുകല്ലും എം സാന്‍ഡും നിറച്ചു എന്നാണ് നിതിന്റെ പരാതി.
ചാലക്കുടി ഫസ്റ്റ് ക്ലാസ് മജിസ്‌ട്രേറ്റിനാണ് നിതിന്‍ പരാതി നല്‍കിയത്. ഇതിന്റെ അടിസ്ഥാനത്തില്‍ മോട്ടോര്‍ വെഹിക്കിള്‍ ഡിപ്പാര്‍ട്ട്‌മെന്റിനോട് ഇരുവിഭാഗത്തിന്റെയും സാന്നിധ്യത്തില്‍ പരിശോധന നടത്താന്‍ കോടതി നിര്‍ദേശിച്ചു. ഇന്ന് മോട്ടോര്‍ വെഹിക്കിള്‍ ഡിപ്പാര്‍ട്ട്‌മെന്റ് വാഹനം പരിശോധിച്ചു എങ്കിലും കോടതി നിര്‍ദേശമുണ്ടായിട്ടും നിതിനെ പങ്കെടുപ്പിച്ചില്ലെന്നാണ് ആക്ഷേപം.
പ്രതികരിക്കാൻ ഇവിടെ എഴുതുക: