തിരുപ്പതി: ആന്ധ്രാ പ്രദേശില്‍ സര്‍വകലാശാല അദ്ധ്യാപകനെ ഭാര്യയുടെ മുന്നിലിട്ട് ബന്ധുവായ യുവാവ് കഴുത്തറത്ത് കൊലപ്പെടുത്തി. അദ്ധ്യാപകന്റെ ഭാര്യ ഹൃദയാഘാതത്തെ തുടര്‍ന്ന് മരിച്ചു.
അനന്തപുരില്‍ ഞായറാഴ്ച രാത്രിയാണ് സംഭവം. ജെഎന്‍ടിയു കാമ്പസിന് എതിര്‍വശം എല്‍ഐസി കോളനിയിലെ അപ്പാര്‍ട്ട്മെന്റില്‍ താമസിക്കുന്ന മൂര്‍ത്തി റാവു ഗോഖലെയാണ് (59) കൊല്ലപ്പെട്ടത്. മൂര്‍ത്തിയുടെ ഭാര്യ ശോഭ ഗോഖലെയും (56) മരിച്ചു. ഹൃദയാഘാതത്തെ തുടര്‍ന്നാണ് ഇവരുടെ മരണമെന്നാണ് റിപ്പോര്‍ട്ട്. മൂര്‍ത്തിയെ കൊലപ്പെടുത്തിയ ആദിത്യ എന്നയാളെ കസ്റ്റഡിയിലെടുത്തതായി പോലീസ് അറിയിച്ചു.
അനന്തലക്ഷ്മി എന്‍ജിനീയറിങ് കോളജിലെ മുന്‍ പ്രിന്‍സിപ്പലും എസ്‌കെ സര്‍വകലാശാലയിലെ ഗസ്റ്റ് ഫാക്കല്‍റ്റിയുമാണ് കൊല്ലപ്പെട്ട മൂര്‍ത്തി. കേസില്‍ അറസ്റ്റിലായ ആദിത്യ, മൂര്‍ത്തിയുടെ സഹോദരപുത്രനാണ്.
എന്‍ജിനീയറിങ്ങില്‍ ബിരുദാനന്തര ബിരുദം നേടിയ ഇയാള്‍ ഒരു പ്രമുഖ കമ്പനിയില്‍ ജോലി ലഭിക്കാനായി മൂര്‍ത്തിക്ക് പണം നല്കിയിരുന്നു. എന്നാല്‍, ജോലി ശരിയാക്കാന്‍ മൂര്‍ത്തിക്കായില്ല. മാത്രമല്ല, യുവാവിന്റെ ഫോണ്‍വിളികളോടും പ്രതികരിച്ചില്ല. തുടര്‍ന്നുണ്ടായ വൈരാഗ്യമാണ് കൊലപാതകത്തില്‍ കലാശിച്ചതെന്ന് പോലീസ് കൂട്ടിച്ചേര്‍ത്തു.
ഞായറാഴ്ച രാത്രി മൂര്‍ത്തിയുടെ വീട്ടിലെത്തിയ പ്രതി ഇദ്ദേഹവുമായി ഏറെനേരം വഴക്കിട്ടു. പിന്നാലെ കൈയില്‍ കരുതിയിരുന്ന കത്തികൊണ്ട് മൂര്‍ത്തിയെ ആക്രമിക്കുകയായിരുന്നു. രക്ഷിക്കാന്‍ ശ്രമിച്ച ശോഭയെയും ഇയാള്‍ ആക്രമിച്ചു. തുടര്‍ന്നാണ് ഇവര്‍ക്ക് ഹൃദയാഘാതമുണ്ടായത്. ഇരുവരുടെയും മൃതദേഹങ്ങള്‍ പോസ്റ്റ്മോര്‍ട്ടത്തിനായി ആശുപത്രി മോര്‍ച്ചറിയിലേക്ക് മാറ്റി.
പ്രതികരിക്കാൻ ഇവിടെ എഴുതുക: