കോട്ടയം: ഫേസ്ബുക്കില്‍ കണ്ട പരസ്യത്തിലെ ലിങ്കിലൂടെ സ്വകാര്യ ബാങ്കിലെ ലോണിന് അപേക്ഷിച്ച യുവതിക്ക് നഷ്ടമായത് രണ്ട് ലക്ഷം രൂപ.
സംഭവത്തില്‍ എറണാകുളം ഫോര്‍ട്ട് കൊച്ചി സ്വദേശി നഹാസ്, പള്ളുരുത്തി സ്വദേശി സാദത്ത് പി.ടി (34) എന്നിവരെ ഈരാറ്റുപേട്ട പൊലീസ് പൊലീസ് പിടികൂടി.
ഭരണങ്ങാനം സ്വദേശിനിയാണ് തട്ടിപ്പിനിരയായത്. പേഴ്‌സണല്‍ ലോണ്‍ തരപ്പെടുത്തി നല്‍കാം എന്ന് പറഞ്ഞ് യുവതിയില്‍ നിന്നും 200000 രൂപ പ്രതികള്‍ പല തവണയായി തട്ടിയെടുക്കുകയായിരുന്നു.ഫേസ്ബുക്കില്‍ സ്വകാര്യ ബാങ്കിന്റെ പേഴ്‌സണല്‍ ലോണ്‍ പരസ്യം കണ്ട് ലിങ്ക് വഴി യുവതി ലോണിന് അപേക്ഷിച്ചു.
അഞ്ച് ലക്ഷം രൂപ വരെ ലോണ്‍ ലഭിക്കുമെന്നും ഇതിനായി പ്രോസസിംഗ് ഫീസും, മറ്റിനത്തിലുമായി പണം അടയ്‌ക്കണമെന്നും പ്രതികള്‍ പറഞ്ഞു. പല തവണയായി പ്രതികള്‍ പണം വാങ്ങി. പിന്നീട് തട്ടിപ്പാണെന്ന് മനസിലാക്കിയ യുവതി പൊലീസില്‍ പരാതി നല്‍കുകയായിരുന്നു.
നഹാസിനേയും സാദത്തിനേയും കോടതിയില്‍ ഹാജരാക്കി റിമാന്‍ഡ് ചെയ്തു. തട്ടിപ്പില്‍ കൂടുതല്‍ പേര്‍ക്ക് പങ്കുണ്ടോയെന്നും പൊലീസ് അന്വേഷിക്കുന്നുണ്ട്.
പ്രതികരിക്കാൻ ഇവിടെ എഴുതുക: