മലപ്പുറം: നടത്തിപ്പുകാര്‍ തമ്മിലുളള തര്‍ക്കത്തില്‍ ശൗചാലയം പൂട്ടിയതോടെ ഉള്ളില്‍ കുടുങ്ങിയ യുവാവിനെ പൊലീസെത്തി പുറത്തിറക്കി. കുറ്റിപ്പുറം ബസ് സ്റ്റാന്‍ഡിലെ കംഫര്‍ട്ട് സ്റ്റേഷനിലാണ് യുവാവ് കുടുങ്ങിയത്. കംഫര്‍ട്ട് സ്റ്റേഷന്‍ നടത്തിപ്പുകാരനായ ചങ്ങരംകുളം സ്വദേശി റഫീഖിനെ പൊലീസ് അറസ്റ്റ് ചെയ്തു.
ശനിയാഴ്ചയാണ് സംഭവം. നടത്തിപ്പുകാര്‍ തമ്മില്‍ തര്‍ക്കിച്ചതോടെ കുറ്റിപ്പുറം സ്റ്റാന്‍ഡിലെ കംഫര്‍ട്ട് സ്റ്റേഷന്‍ പൂട്ടിയിട്ട് പോവുകയായിരുന്നു. കംഫര്‍ട്ട് സ്റ്റേഷനുളളില്‍ യുവാവ് പെട്ട വിവരമറിയാതെയാണ് നടത്തിപ്പുകാരന് പൂട്ടിയത്. നാട്ടുകാരും പൊലീസും എത്തി പൂട്ട് തുറന്നാണ് യുവാവിനെ പുറത്തിറക്കിയത്.ഒടുവില്‍ പൊലീസ് കംഫര്‍ട്ട് സ്റ്റേഷന്‍ അടച്ചിട്ടു.
റെയില്‍വേ സ്റ്റേഷനിലെ കംഫര്‍ട്ട് സ്റ്റേഷനും നടത്താന്‍ ആളില്ലാത്തതിനാല്‍ അടച്ചിട്ടിരിക്കുകയാണ്. കാത്തിരിപ്പ് മുറിയിലെ ശുചിമുറികളാണ് യാത്രക്കാര്‍ക്ക് ആശ്രയമാകുന്നത്. ബസ് സ്റ്റാന്‍ഡിലെ കംഫര്‍ട്ട് സ്റ്റേഷന്‍ നിലവിലെ നടത്തിപ്പുകാരന് പഞ്ചായത്ത് നിശ്ചയിച്ച കാലാവധി മാര്‍ച്ച് 31 വരെയുണ്ട്.
ബദല്‍ സംവിധാനം ഏര്‍പ്പെടുത്തി പഞ്ചായത്ത് കംഫര്‍ട്ട് സ്റ്റേഷന്‍ തുറന്ന് പ്രവര്‍ത്തിപ്പിക്കണം എന്നാണ് ആവശ്യമുയര്‍ന്നിട്ടുളളത്. നിലവില്‍ ഹോട്ടലുകളെയാണ് എല്ലാവരും ശുചിമുറി സൗകര്യത്തിനായി ആശ്രയിക്കുന്നത്.
പ്രതികരിക്കാൻ ഇവിടെ എഴുതുക: