ബെംഗളൂരു: ഭൂമി കയ്യേറ്റം ചോദ്യം ചെയ്തതിന് വീട്ടമ്മയെ നഗ്‌നയാക്കി മര്‍ദിച്ചതായി പരാതി. ബെളഗാവിയിലാണ് സംഭവം. ഏഴ് മാസം മുമ്പാണ് സംഭവം നടന്നതെങ്കിലും ഇപ്പോഴാണ് ഇക്കാര്യം പുറത്തറിയുന്നത്. സംഭവത്തിന്റെ ദൃശ്യങ്ങള്‍ സമൂഹ മാധ്യമങ്ങളില്‍ പ്രചരിക്കാന്‍ തുടങ്ങിയതോടെയാണ് വിഷയത്തില്‍ പോലീസ് ഇടപെട്ടത്.
കഴിഞ്ഞ വര്‍ഷം ജൂലൈ 31നാണ് കേസിനാസ്പദമായ സംഭവം. 42കാരിയായ സ്ത്രീക്ക് സര്‍ക്കാര്‍ അനുവദിച്ച മൂന്ന് ഏക്കര്‍ ഭൂമിയില്‍ അര ഏക്കര്‍ ഭൂമി ഒരു സംഘം കയ്യേറിയതിനെ തുടര്‍ന്നാണ് പ്രശ്‌നമുണ്ടായത്. വീട്ടമ്മയും ഇവരുടെ മകനും ഇതിനെ ചോദ്യം ചെയ്തിരുന്നു. തുടര്‍ന്ന് ഇരു വിഭാഗങ്ങളും തമ്മില്‍ വാക്ക് തര്‍ക്കം ഉണ്ടായെന്നും യുവതിയെയും മകനെയും സംഘം മര്‍ദിച്ചെന്നും പോലീസ് പറഞ്ഞു.
പിന്നാലെ യുവതിയെ നഗ്‌നയാക്കി നടത്തിച്ച പ്രതികള്‍ പോലീസിനെ സമീപിച്ചാല്‍ കൊന്ന് കളയുമെന്ന് ഭീഷണിപ്പെടുത്തിയെന്നും പരാതിയില്‍ ആരോപിച്ചു. സംഭവത്തില്‍ വിശദ അന്വേഷണം പുരോഗമിക്കുകയാണെന്ന് പോലീസ് പറഞ്ഞു.
പ്രതികരിക്കാൻ ഇവിടെ എഴുതുക