കൊച്ചി: സിനിമാ വിതരണത്തിന്റെയും ബിസിനസിന്റെയും പേരില് കോടികളുടെ തട്ടിപ്പ് നടത്തിയെന്നാരോപിച്ച് ഓസ്ട്രേലിയന് മലയാളിയായ വ്യവസായിക്കെതിരെ ചലച്ചിത്ര നിര്മാതാവ് രംഗത്ത്. ജയസൂര്യ നായകനായ ‘വെള്ളം’ സിനിമയുടെ നിര്മാതാവ് കെ.വി. മുരളീദാസാണ് പരാതിയുമായി എത്തിയിരിക്കുന്നത്. മുരളീദാസിന്റെ ബയോപിക് ആയാണ് സംവിധായകന് പ്രജീഷ് സെന് സിനിമ ഒരുക്കിയത്.
ഓസ്ട്രേലിയയിലെ പെര്ത്ത് കേന്ദ്രമായി പ്രവര്ത്തിക്കുന്ന ആലപ്പുഴ ചമ്പക്കുളം സ്വദേശി ഷിബു ജോണിനെതിരെയാണ് പരാതി. സിനിമാ വിതരണത്തിന്റെയും വിദേശ കമ്പനി
കളിലെ പങ്കാളിത്തത്തിന്റെയും പേരില് ഇയാള് കോടിക്കണക്കിന് രൂപ പറ്റിച്ചെന്ന് മുരളി നേരത്തെ മുഖ്യമന്ത്രിക്കും സംസ്ഥാന പോലീസ് മേധാവിക്കും പരാതി നല്കിയിരുന്നു. ഓസ്ട്രേലിയയില് ഇയാളുടെ തട്ടിപ്പിനിരയായ പത്തോളം പേരും പരാതി നല്കിയിട്ടുണ്ടെന്ന് അറിയുന്നു. ഇതിന്റെ അടിസ്ഥാനത്തില് കേരള പോലീസും ഓസ്ട്രേലിയന് ഫെഡറല് പോലീസും ഇയാള്ക്കെതിരെ കേസെടുത്തിട്ടുണ്ട്.
സിനിമകളുടെ ഓവര്സീസ് വിതരണക്കാരനായ ലണ്ടന് മലയാളി വഴിയാണ് ഷിബുവിനെ മുരളി പരിചയപ്പെട്ടത്. തുടര്ന്ന് ഇരുവരും ഓസ്ട്രേലിയയില്, 65 ശതമാനം ഷിബുവിനും 35 ശതമാനം മുരളിക്കും എന്ന പങ്കാളിത്ത വ്യവസ്ഥയില് വാട്ടര്മാന് ഓസ്ട്രേലിയ പ്രൈവറ്റ് ലിമിറ്റഡ് എന്ന പേരില് കമ്പനി ആരംഭിച്ചു. എന്നാല് ഒരു വര്ഷം കഴിയുന്നതിന് മുമ്പേ തന്റെ അറിവില്ലാതെ കമ്പനിയുടെ പങ്കാളിത്തത്തില് നിന്ന് ഒഴിവാക്കിയെന്നും കച്ചവടത്തിനായി പെര്ത്തിലേക്ക് അയച്ച ടൈലിന്റെ വിലയായ 1.16 കോടി രൂപ നല്കിയില്ലെന്നുമാണ് മുരളി പോലീസില് പരാതി നല്കിയത്.
കണ്ണൂരിലെ പരിയാരം മെഡി. കോളജ് പോലീസ് സ്റ്റേഷനിലും ഇയാള്ക്കെതിരെ പരാതിയുണ്ട്. പിലാത്തറ നരീക്കാംവള്ളി ഇല്ലത്തുവീട്ടില് സ്മിതയാണ് പരാതിക്കാരി. ഭര്ത്താവ് അനൂപിനെ നിര്മാണക്കമ്പനിയില് പങ്കാളിയാക്കാമെന്ന് പറഞ്ഞ് 28 ലക്ഷം രൂപ തട്ടിയെടുത്തെന്നാണ് പരാതി. ഓസ്ട്രേലിയയില് പരാതി നല്കിയിരിക്കുന്നവരില് മലയാളിയായ ഒരാള്ക്ക് മാത്രം 50 കോടി രൂപയാണ് നഷ്ടമായിരിക്കുന്നതെന്നു മുരളി പറഞ്ഞു.
പ്രദര്ശന വിജയം നേടിയ പല ചിത്രങ്ങളുടെയും വിതരണാവകാശവും കമ്പനിയിലെ പങ്കാളിത്തവും വാഗ്ദാനം ചെയ്താണ് തട്ടിപ്പുകള് ഏറെയുമത്രേ. പരാതികള് കണക്കിലെടുത്ത് ഇയാളെ ഉടന് അറസ്റ്റ് ചെയ്യണമെന്ന് മുരളി വാര്ത്താസമ്മേളനത്തില് ആവശ്യപ്പെട്ടു.
