ആലപ്പുഴ: മദ്യലഹരിയിൽ പോലീസിനെയും ആശുപത്രി ജീവനക്കാരെയും മർദിച്ച സൈനികരായ ഇരട്ട സഹോദരങ്ങൾ അറസ്റ്റിൽ. ഹരിപ്പാട് ചിങ്ങോലി സ്വദേശികളായ അനന്തൻ, ജയനന്തൻ എന്നിവരെയാണ് പോലീസ് കസ്റ്റഡിയിലെടുത്തത്. മദ്യപിച്ച് വാഹനമോടിച്ച് അപകടമുണ്ടാക്കിയതിനു പിന്നാലെ ആശുപത്രിയിലെത്ത് പരിശോധന നടത്തുന്നതിനിടെയാണ് അതിക്രമം.
ഞായറാഴ്ച രാത്രി 11.15ഓടെയാണ് സംഭവം. അമിതമായി മദ്യപിച്ച ശേഷം വാഹനമോടിക്കുന്നതിനിടെ നങ്ങ്യാർകുളങ്ങരയ്‌ക്ക് സമീപം ഡിവൈഡറിൽ ഇടിച്ചുക‍യറുകയായിരുന്നു. പരുക്കേറ്റ ഇവരെ പോലീസും നാട്ടുകാരും ചേർന്ന് ആശുപത്രിയിലെത്തിക്കുകയായിരുന്നു. ഇതിനിടെയാണ് ഇരുവരും ഡോക്ടറെയും പോലീസിനെയും ആക്രമിച്ചത്. ആശുപത്രിയുടെ വാതിലും തകർത്തു. തുടർന്ന് നാട്ടുകാരും പോലീസും ചേർന്ന് ബലപ്രയോഗത്തിലൂടെ ഇവരെ ജീപ്പിൽ കയറ്റി പോലീസ് സ്റ്റേഷനിൽ എത്തിക്കുകയായിരുന്നു.
ഇരുവര്‍ക്കുമെതിരെ ഡോക്ടറെയും ആശുപത്രി ജീവനക്കാരെയും പോലീസുകാരെയും മര്‍ദ്ദിച്ചതിനും ആശുപത്രി ഉപകരണങ്ങൾ നശിപ്പിച്ചതിനും ആശുപത്രിയിൽ നാശനഷ്ടം ഉണ്ടാക്കിയതിനുമെല്ലാം വിവിധ വകുപ്പുകൾ ചേര്‍ത്ത് ജാമ്യമില്ലാ കേസ് രജിസ്റ്റര്‍ ചെയ്തു.
പ്രതികരിക്കാൻ ഇവിടെ എഴുതുക: