തിരുവനന്തപുരം: മല്ലിക സുകുമാരന്റെ സിനിമ ജീവിതത്തിലെ 50 വര്‍ഷങ്ങള്‍ ആഘോഷിച്ച് തലസ്ഥാനം. തമ്പാനൂര്‍ അപ്പോളോ ഡിമോറ ഹോട്ടലില്‍ വച്ച് നടന്ന പരിപാടി മന്ത്രി പി രാജീവ് ഉദ്ഘാടനം ചെയ്തു.
ഉത്തരായനം, സ്വയംവരം എന്നിങ്ങനെ മലയാള സിനിമയുടെ ദിശയെ നിയന്ത്രിച്ച രണ്ട് ചിത്രങ്ങളില്‍ അഭിനയിച്ച വ്യക്തിയെന്ന നിലയില്‍ മല്ലിക സുകുമാരനെ ഒരിക്കലും മറക്കാനാകില്ലെന്നും, പ്രതിസന്ധികളെ അസാമാന്യ ധൈര്യത്തോടെ നേരിട്ട വ്യക്തിയാണ് മല്ലികയെന്നും, തനിക്ക് ശരിയെന്ന് തോന്നുന്നത് ധൈര്യമായി ചെയ്‌തെന്നും മന്ത്രി പറഞ്ഞു. മല്ലിക സുകുമാരന് ഇനിയും നല്ല രീതിയില്‍ മുന്നേറാന്‍ കഴിയട്ടേയെന്നും മന്ത്രി ആശംസിച്ചു.
ദുര്‍ഘടകരമായ അവസ്ഥ മറികടക്കാന്‍ കൂടെ നിന്ന സഹോദരങ്ങള്‍, മറ്റു കുടുംബാംഗങ്ങള്‍, മക്കള്‍ എന്നിവരുടെ പിന്തുണയും, സിനിമാ മേഖലയിലെ സഹായവും മറക്കാനാകാത്തതാണെന്ന് പരിപാടിയില്‍ സംസാരിക്കവെ മല്ലിക പറഞ്ഞു.
അന്‍പതാം വാര്‍ഷികം ആഘോഷിക്കുക എന്നത് സുഹൃത് സംഘത്തിന്റെ താല്‍പര്യമായിരുന്നു. അത് എല്ലാവരും ഏറ്റെടുത്തതായും എല്ലാവരെയും നന്ദിപൂര്‍വ്വം സ്മരിക്കുന്നതായും മല്ലിക സുകുമാരന് പറഞ്ഞു. മക്കളും നടന്‍മാരുമായ ഇന്ദ്രജിത്ത് സുകുമാരനും, പൃഥ്വിരാജ് സുകുമാരനും അമ്മയുടെ ജീവിതത്തിലെ ആപത്ഘട്ടങ്ങളെക്കുറിച്ച് സ്മരിച്ചപ്പോള്‍ മൂവരും കണ്ണീരണിഞ്ഞു. ഇന്ദ്രജിത്തിന്റെ ഭാര്യ പൂർണിമയും പൃഥ്വിരാജിന്റെ ഭാര്യ സുപ്രിയയും മറ്റു കുടുംബാംഗങ്ങളും ചടങ്ങിനെത്തിയിരുന്നു.
പരിപാടിയില്‍ മന്ത്രി ജി ആര്‍ അനില്‍ അധ്യക്ഷത വഹിച്ചു. മന്ത്രി പി രാജീവ് മല്ലിക സുകുമാരനെ പൊന്നാട അണിയിച്ചു. മുന്‍ എംപി പന്ന്യന്‍ രവീന്ദ്രന്‍ ബൊക്കെ സമര്‍പ്പിച്ചു. സംവിധായകന്‍ ഷാജി എന്‍ കരുണ്‍ സംഘാടകരായ ഫ്രണ്ട്‌സ് ആന്റ് ഫോസ് കൂട്ടായ്മയുടെ ഉപഹാരം സമര്‍പ്പിച്ചു.
ചടങ്ങില്‍ ഡോ. എം വി പിള്ള, ബിജു പ്രഭാകര്‍ ഐ എ എസ്, ഇന്ദ്രന്‍സ്, മണിയന്‍ പിള്ള രാജു, എം ജയചന്ദ്രന്‍, അഡ്വ. ശങ്കരന്‍ കുട്ടി, ഡോ. ഭീമാ ഗോവിന്ദന്‍, എന്നിവര്‍ സംസാരിച്ചു. സംഘാടക സമിതി ചെയര്‍മാന്‍ ജി സുരേഷ് കുമാര്‍ സ്വാഗതവും സെക്രട്ടറി ജ്യോതി കുമാര്‍ ചാമക്കാല നന്ദിയും പറഞ്ഞു.
പ്രതികരിക്കാൻ ഇവിടെ എഴുതുക: