മുംബൈ: മാർക്കറ്റിൽ 3.37 കോടി രൂപ വിലമതിക്കുന്ന എംഡിഎംഎയുമായി വിദേശ പൗരനെ തീവ്രവാദ വിരുദ്ധ സ്ക്വാഡിന്റെ മുംബൈ വിഭാഗം ജുഹു മേഖലയിൽ നിന്ന് അറസ്റ്റ് ചെയ്തു. ജുഹു താര റോഡിലെ ഒരു പഞ്ചനക്ഷത്ര ഹോട്ടലിന് സമീപത്തു നിന്നാണ് പ്രതിയെ പിടികൂടിയതെന്ന് ഉദ്യോഗസ്ഥർ പറഞ്ഞു.
3.37 കോടി രൂപ വിലമതിക്കുന്ന എംഡിഎംഎയുമായി ഈഗ്‌വ് ജോണാണ് അറസ്റ്റിലായത്. പിടിയിലായ സമയത്ത് ഇയാളുടെ പക്കൽ നിന്ന് രണ്ട് കിലോഗ്രാം മയക്കുമരുന്ന് കണ്ടെത്തി. തുടർന്ന് ഇയാളുടെ പാൽഘറിലെ നലസോപാരയിലുള്ള വീട്ടിൽ നിന്ന് 250 ഗ്രാം കൂടി പിടികൂടിയെന്ന് എടിഎസ് ഉദ്യോഗസ്ഥൻ പറഞ്ഞു.
അന്വേഷണത്തിൽ പ്രതി വിദേശിയാണെന്നും എന്നാൽ പൗരത്വവും ക്രിമിനൽ പശ്ചാത്തലവും മറയ്‌ക്കാൻ പാസ്‌പോർട്ട് നശിപ്പിച്ചതായും ഉദ്യോഗസ്ഥർ പറഞ്ഞു. ഇയാളുടെ കൂട്ടാളികൾ ഒളിവിലാണ്.
എൻഡിപിഎസ് ആക്‌ട് പ്രകാരം കേസ് രജിസ്റ്റർ ചെയ്തിട്ടുണ്ടെന്നും മയക്കുമരുന്ന് ശൃംഖലയെക്കുറിച്ച് കൂടുതൽ അന്വേഷണം നടക്കുകയാണെന്നും എടിഎസ് ഉദ്യോഗസ്ഥർ കൂട്ടിച്ചേർത്തു.
പ്രതികരിക്കാൻ ഇവിടെ എഴുതുക: