കൊച്ചി: ആലുവയിൽ ഏഴുവയസുകാരനെ ഇടിച്ചിട്ട കാറിന്റെ ഉടമയുടെ സുഹൃത്ത് കസ്റ്റഡിയിൽ. നെടുമ്പാശേരി സ്വദേശി ഷാൻ ആണ് പിടിയിലായത്. ഷാനും വാഹനത്തിന്റെ ഉടമ രഞ്ജിനിയും അപകടം നടക്കുമ്പോൾ കാറിൽ ഉണ്ടായിരുന്നു. അപകട സമയത്ത് സുഹൃത്താണ് കാര്‍ ഓടിച്ചതെന്ന് ഇവര്‍ പറഞ്ഞത് പ്രകാരം ഷാനിനെ പോലീസ് കസ്റ്റഡിയിലെടുക്കുകയായിരുന്നു.
ചോദ്യം ചെയ്യലില്‍ കുട്ടി കാറിനടയില്‍പെട്ടത് അറിഞ്ഞില്ലെന്നാണ് അവര്‍ പോലീസിനോട് പറഞ്ഞിട്ടുള്ളത്. പ്രതിയുടെ അ റസ്റ്റ് ഉടൻ രേഖപ്പെടുത്തുമെന്ന് ഡി വൈ എസ് പി എ പ്രസാദ് പറഞ്ഞു. വാഹന ഉടമ രഞ്ജിനിയും പോലീസ് കസ്റ്റഡിയിലാണ്. കേസന്വേഷണത്തിൽ വീഴ്ചയുണ്ടായെന്ന ബന്ധുക്കളുടെ ആരോപണം അന്വേഷിക്കുമെന്ന് നടപടി സ്വീകരിക്കുമെന്നും ഡിവൈഎസ്പി പറഞ്ഞു.
കമ്പ്യൂട്ടർ ഹാർഡ്‌വെയർ ടെക്‌നിഷ്യനാണ് ഷാൻ. ഇന്നലെ രാവിലെയാണ് ഓട്ടോറിക്ഷയില്‍ നിന്ന് റോഡിലേക്ക് വീണ കുട്ടിയുടെ ദേഹത്ത് കാര്‍ കയറി ഇറങ്ങിയത്. ഷാനും രഞ്ജിനിയും ക്ഷേത്രത്തിൽ പോയി വരികയായിരുന്നു. ഇന്നലെ രാത്രി 10 മണിയോടെ ആശുപത്രിയിലെത്തി പോലീസ് കുട്ടിയുടെ അച്ഛന്റെ മൊഴി രേഖപ്പെടുത്തി. തുടര്‍ന്ന് നടത്തിയ അന്വേഷണത്തിലാണ് ഇന്ന് രാവിലെ പത്ത് മണിയോടെ കാര്‍ കണ്ടെത്തിയത്. പിന്നാലെ ഉടമയെ പോലീസ് കസ്റ്റഡിയിലെടുക്കുകയായിരുന്നു.
ആശുപത്രിയിൽ പോയി ഓട്ടോറിക്ഷയിൽ മടങ്ങുന്നതിനിടെ അച്ഛൻ പ്രജിത്ത് ഓടിച്ച ഓട്ടോറിക്ഷയില്‍ നിന്നാണ് ഏഴ് വയസുകാരൻ മകൻ നിഷികാന്ത് റോഡിലേക്ക് തെറിച്ച് വീണത്.
പ്രതികരിക്കാൻ ഇവിടെ എഴുതുക: