ന്യൂദൽഹി: ഇന്ത്യൻ ഓഷ്യൻ കോൺഫറൻസിന് ഫെബ്രുവരി 9 ന് പെർത്തിൽ തുടക്കമാകും. ഇന്ത്യൻ മഹാസമുദ്രത്തെക്കുറിച്ചുള്ള ദ്വിദിന സമ്മേളനത്തിൽ പങ്കെടുക്കാനായി വിദേശകാര്യ മന്ത്രി എസ്. ജയശങ്കർ ഓസ്ട്രേലിയൻ നഗരമായ പെർത്തിലേക്ക് പോകും. ശ്രീലങ്കൻ പ്രസിഡൻ്റ് റനിൽ വിക്രമസിംഗെ, ഓസ്ട്രേലിയൻ വിദേശകാര്യ മന്ത്രി പെന്നി വോങ്, സിംഗപ്പൂർ വിദേശകാര്യമന്ത്രി വിവിയൻ ബാലകൃഷ്ണൻ എന്നിവർക്കൊപ്പം ജയശങ്കറും സമ്മേളനത്തിന്റെ ഉദ്ഘാടന സെഷനിൽ പ്രസംഗിക്കും.
ഇന്ത്യ ഫൗണ്ടേഷനുമായി സഹകരിച്ച് വിദേശകാര്യ മന്ത്രാലയം (എംഇഎ) വർഷം തോറും സംഘടിപ്പിക്കുന്ന മേഖലയിലെ രാജ്യങ്ങൾക്കായുള്ള ഒരു മുൻനിര കൺസൾട്ടേറ്റീവ് ഫോറമാണ് ‘ഇന്ത്യൻ ഓഷ്യൻ കോൺഫറൻസ്’ .സിംഗപ്പൂരിലെ എസ് രാജരത്നം സ്കൂൾ ഓഫ് ഇൻ്റർനാഷണൽ സ്റ്റഡീസ്, പെർത്ത്-യുഎസ് ഏഷ്യ സെൻ്റർ, ഓസ്ട്രേലിയൻ ഗവൺമെൻ്റിന്റെ ഫോറിൻ അഫയേഴ്സ് ആൻഡ് ട്രേഡ് ഡിപ്പാർട്ട്മെൻ്റ് എന്നിവയുടെ സഹകരണത്തോടെ ഫെബ്രുവരി 9, 10 തീയതികളിൽ കോൺഫറൻസിന്റെ ഏഴാമത് എഡിഷനാണ് പെർത്തിൽ നടക്കുന്നത്.
” ഉറപ്പുള്ളതും സുസ്ഥിരവുമായ ഇന്ത്യൻ മഹാസമുദ്രത്തിലേക്ക്” എന്നതാണ് സമ്മേളനത്തിന്റെ ഈ പതിപ്പിന്റെ പ്രമേയം. 22-ലധികം രാജ്യങ്ങളിൽ നിന്നുള്ള മന്ത്രിമാരും 16 രാജ്യങ്ങളിൽ നിന്നുള്ള മുതിർന്ന ഉദ്യോഗസ്ഥരും ആറ് ബഹുമുഖ സംഘടനകളും നേതൃത്വം നൽകുന്ന പ്രതിനിധി സംഘങ്ങളെ കോൺഫറൻസ് ഒരുമിച്ച് കൊണ്ടുവരുമെന്ന് എംഇഎ പ്രസ്താവനയിൽ പറഞ്ഞു.
40 ഓളം രാജ്യങ്ങളിൽ നിന്നുള്ള 400-ലധികം സാമൂഹിക, കോർപ്പറേറ്റ് നേതാക്കൾ, പോളിസി പ്രാക്ടീഷണർമാർ, പണ്ഡിതന്മാർ, പ്രൊഫഷണലുകൾ, മാധ്യമ പ്രവർത്തകർ എന്നിവരുടെ പങ്കാളിത്തത്തിനും സമ്മേളനം സാക്ഷ്യം വഹിക്കും.
2016-ൽ സിംഗപ്പൂരിൽ വച്ചാണ് കോൺഫറൻസ് തുടങ്ങിയത്. ഇത് മേഖലയിലെ എല്ലാവരുടെയും സുരക്ഷയ്ക്കും വളർച്ചയ്ക്കും വേണ്ടിയുള്ള പ്രാദേശിക സഹകരണത്തിന്റെ സാധ്യതകളെക്കുറിച്ച് ആലോചിക്കുന്നു. ഒപ്പം മേഖലയിലെ പ്രധാന സമുദ്ര പങ്കാളികളെ ഒരു പൊതു പ്ലാറ്റ്ഫോമിൽ ഒരുമിച്ച് കൊണ്ടുവരുന്നതിൽ ഒരു പ്രധാന പങ്ക് വഹിക്കുന്നുണ്ടെന്നും എംഇഎ പറഞ്ഞു.
