തിരുവനന്തപുരം: സ്കൂള് വിദ്യാര്ഥിനിയെ പീഡിപ്പിച്ച കേസില് യുവതിക്ക് വീണ്ടും കഠിന തടവും പിഴയും.വീണകാവ് അരുവിക്കുഴി മുരിക്കറ കൃപാലയത്തില് സന്ധ്യയ്ക്കാണ് (31) വീണ്ടും തടവും പിഴയും വിധിച്ചത്.കാട്ടാക്കട അതിവേഗ പോക്സോ കോടതി ജഡ്ജി എസ് രമേശ് കുമാറാണ് ശിക്ഷ വിധിച്ചത്.നിലവില് മൂന്ന് പോക്സോ കേസുകളിലാണ് സന്ധ്യ ശിക്ഷ അനുഭവിക്കുന്നത്.
വിവിധ വകുപ്പുകളിലായി ഒമ്പതര വര്ഷം കഠിന തടവും 40,000 രൂപ പിഴയുമാണ് ശിക്ഷ വിധിച്ചത്. പിഴ തുക അതിജീവിതയ്ക്ക് നല്കണം. പിഴയൊടുക്കിയില്ലെങ്കില് ഏഴുമാസം അധിക കഠിന തടവ് അനുഭവിക്കണം.
2016ലാണ് കേസിനാധാരമായ സംഭവം നടന്നത്. സ്കൂള് അവധിക്ക് ബന്ധു വീട്ടിലെത്തിയ പെണ്കുട്ടിയെയാണ് സന്ധ്യ ലൈംഗികമായി പീഡിപ്പിച്ചത്. വീട്ടിലെത്തി പെണ്കുട്ടിയുമായി സൗഹൃദം സ്ഥാപിച്ച് ലൈംഗികമായി പീഡിപ്പിക്കുകയായിരുന്നു. പിന്നീട് കുളിക്കുന്ന സമയത്ത് പെണ്കുട്ടിയുടെ നഗ്നചിത്രങ്ങള് പകര്ത്തിയ ശേഷം കഴുത്തിലണിഞ്ഞിരുന്ന സ്വര്ണമാല നല്കിയില്ലെങ്കില് ചിത്രങ്ങള് പ്രചരിപ്പിക്കുമെന്ന് ഭീഷണിപ്പെടുത്തി മാല വാങ്ങി. പിന്നീട് സ്കൂളിന്റെ മുന്നില് നിന്ന് സുഹൃത്തിനൊപ്പം ചേര്ന്ന് പെണ്കുട്ടിയെ സ്കൂട്ടറില് കയറ്റി അരുവിക്കുഴിയിലെ വീട്ടിലെത്തിച്ച ശേഷം മദ്യം കുടിപ്പിച്ച് ലൈംഗികമായി പീഡിപ്പിച്ചെന്നുമാണ് പ്രോസിക്യൂഷന് കേസ്. കേസിലെ രണ്ടാം പ്രതി വിചാരണ സമയത്ത് മരിച്ചിരുന്നു.
കുറച്ച് ദിവസം മുന്പ് മറ്റൊരു കേസിലും കാട്ടാക്കട പോക്സോ കോടതി സന്ധ്യയെ ശിക്ഷിച്ചിരുന്നു. വേറൊരു കേസില് ആലപ്പുഴ ജില്ലാ കോടതിയും സന്ധ്യയെ ശിക്ഷിച്ചിരുന്നു. ഈ കേസുകളില് സന്ധ്യ ജയിലിലാണ്.
