തൃശ്ശൂര്‍: തന്റെയും കുടുംബാംഗങ്ങളുടെയും പേരിലുള്ള സ്ഥിരനിക്ഷേപം തിരികെ വേണമെന്ന് ആവശ്യപ്പെട്ട് കരുവന്നൂര്‍ സഹകരണ ബാങ്കിന് മുന്നില്‍ സമരം ചെയ്ത മാപ്രാണം സ്വദേശി ജോഷിക്ക് ആശ്വാസം. ജോഷിയുടെ പേരിലുള്ള സ്ഥിര നിക്ഷേപത്തിന് പലിശ സഹിതം 28 ലക്ഷം രൂപയുടെ ചെക്ക് ബാങ്കിന്റെ നിലവിലെ ഭരണസമിതി നല്‍കി.
കുടുംബാംഗങ്ങളുടെ പേരിലുള്ള ബാക്കി തുകയ്‌ക്ക് മൂന്ന് മാസത്തിനുള്ളില്‍ ഒരു തീയതി നിശ്ചയിച്ച് ബുധനാഴ്ച തന്നെ ചെക്ക് നല്‍കാമെന്നാണ് അറിയിച്ചിരിക്കുന്നതെന്ന് ജോഷി വെളിപ്പെടുത്തി.
ജോഷിയുമായി ബാങ്കിന്റെ സിഇഒ രാജേഷും മാനേജര്‍ വിജയാനന്ദും മൂന്നര മണിക്കൂറോളംചര്‍ച്ച നടത്തി. തുക കിട്ടാത്തതിനെ തുടര്‍ന്ന് കുടുംബബന്ധത്തിലടക്കം പ്രശ്‌നങ്ങള്‍ ഉണ്ടായിരുന്നു. ഇത്രയെങ്കിലും പണം തിരികെ കിട്ടിയ സാഹചര്യത്തില്‍ അതിലൊക്കെ മാറ്റമുണ്ടാകുമെന്ന് കരുതുന്നതായി ജോഷി പറഞ്ഞു.
നിക്ഷേപം മടക്കി നല്‍കാമെന്ന സര്‍ക്കാര്‍ ഉറപ്പ് ലംഘിക്കപ്പെട്ടെന്ന് ആരോപിച്ചാണ് ജോഷി സമരത്തിനെത്തിയത്.
പ്രതികരിക്കാൻ ഇവിടെ എഴുതുക: