കണ്ണൂര്: ‘ആറുമാസമായി ക്ഷേമപെന്ഷന് ലഭിച്ചിട്ട്. തുച്ഛമായ പെന്ഷന് വരുമാനം കൊണ്ടാണ് കുടുംബം മുന്നോട്ടുപോകുന്നത്. അതും മുടങ്ങിയതോടെ എങ്ങനെ ജീവിക്കണം എന്നറിയില്ല. കേരള പദയാത്രയുടെ ഭാഗമായി കണ്ണൂര് തയ്യില് കടപ്പുറത്ത് എത്തിയ ബിജെപി സംസ്ഥാന അധ്യക്ഷന് കെ. സുരേന്ദ്രന് മുന്നില് വി.കെ. വള്ളി പരാതികളുടെ കെട്ടഴിച്ചു. സംസ്ഥാന സര്ക്കാറിന്റെ അവഗണനയുടെ ദുരിതകഥകളായിരുന്നു അവര് നിരത്തിയത്.
വാര്ദ്ധക്യം ബാധിച്ച വള്ളിക്ക് ജീവിതത്തിലെ ഏക ആശ്രയമാണ് ക്ഷേമപെന്ഷന്. എങ്ങനെയെങ്കിലും അതൊന്നു ശരിയാക്കിത്തരണമെന്ന അപേക്ഷയാണ് കെ. സുരേന്ദ്രന് മുന്നില് അവര് കണ്ണീരോടെ അറിയിച്ചത്.
മഴക്കാലമായാല് കടലേറ്റം തടയാന് തയ്യില് കടപ്പുറത്ത് പുലിമുട്ട് അത്യാവശ്യമാണ്. നേരത്തെയും ഈ ആവശ്യം ഉന്നയിച്ച് നിരവധി തവണ അധികൃതരെ കണ്ടിരുന്നുവെങ്കിലും അതെല്ലാം ഇപ്പോഴും സ്വപ്നം മാത്രമാണ്. അതായിരുന്ന് കടപ്പുറം വാസികളുടെ പൊതുപരാതി.
തയ്യില് കടലോരവാസികളെ നേരില് കണ്ട് സുഖവിവരങ്ങള് അന്വേഷിച്ച് വീടുകള് സന്ദര്ശിച്ച ശേഷം അവരോടൊപ്പമായിരുന്നു ഇന്നലെ സുരേന്ദ്രന്റെ പ്രഭാത ഭക്ഷണം. മോദിയുടെ ഗ്യാരന്റി ഉറപ്പുള്ള ഗ്യാരന്റിയാണെന്ന നേതാവിന്റെ വാക്കുകളില് കടലോര ജനത വിശ്വാസമര്പ്പിച്ച കാഴ്ചയായിരുന്നു ഇന്നലെ തയ്യില് കടപ്പുറത്തുണ്ടായത്.
ബിജെപി ദേശീയ വൈസ് പ്രസിഡന്റ് എ.പി. അബ്ദുള്ളക്കുട്ടി, ജില്ലാ പ്രസിഡന്റ് എന്. ഹരിദാസ്, സംസ്ഥാന സെക്രട്ടറി കെ. രഞ്ജിത്ത്, ദേശീയ സമിതിയംഗം സി. രഘുനാഥ്, മേഖലാ ജനറല് സെക്രട്ട്രി കെ.കെ. വിനോദ് കുമാര്, മഹിളാ മോര്ച്ച ജില്ലാ അധ്യക്ഷ റീനാ മനോഹരന്, ജില്ലാ ജനറല് സെക്രട്ടറിമാരായ ബിജു ഏളക്കുഴി, എം.ആര്. സുരേഷ് തുടങ്ങിയവരും അദ്ദേഹത്തോടൊപ്പം ഉണ്ടായിരുന്നു.
ബിജെപി തയ്യില് ഏരിയ പ്രസിഡന്റ് എം. ശോഭിത, അമ്പാടി സുനി, കര്സേവകന് സി.പി. മദനന് തുടങ്ങിയവര് ചേര്ന്ന് സുരേന്ദ്രനെ സ്വീകരിച്ചു.
ജന്മഭൂമി ഓണ്ലൈന്