രക്തപങ്കിലമായി ഇറാൻ – പാക്കിസ്ഥാൻ അതിർത്തി : തോക്കുധാരികളുടെ വെടിയേറ്റ് കൊല്ലപ്പെട്ടത് ഒമ്പത് പേർ

കറാച്ചി: പാക്കിസ്ഥാൻ – ഇറാൻ തെക്കുകിഴക്കൻ അതിർത്തിയിൽ അജ്ഞാതരായ തോക്കുധാരികൾ ഒമ്പത് പേരെ വെടിവെച്ച് കൊന്നു. ശനിയാഴ്ച രാത്രിയോടെയാണ് ഈ ദാരുണ സംഭവമെന്ന് മാധ്യമങ്ങൾ റിപ്പോർട്ട് ചെയ്തു.

ഇറാനിലെ സിസ്താനിലെയും ബലൂചിസ്ഥാൻ പ്രവിശ്യയിലെ സരവൺ പട്ടണത്തിനടുത്തുള്ള ഒരു വീട്ടിലാണ് വെടിവെപ്പ് നടന്നതെന്ന് അർദ്ധ ഔദ്യോഗിക വാർത്താ ഏജൻസിയായ മെഹർ റിപ്പോർട്ട് ചെയ്യുന്നുണ്ട്. കൊല്ലപ്പെട്ടവർ ഇറാനികളല്ലെന്നും റിപ്പോർട്ടിലുണ്ട്. അതേ സമയം ആക്രമണത്തിന്റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ല.

ബലൂചിസ്ഥാൻ ജനതയ്‌ക്ക് വേണ്ടി വാദിക്കുന്ന ഹാൽവാഷ് സംഘടന കൊല്ലപ്പെട്ടവരുടെ മൃതദേഹങ്ങൾ പോലെ തോന്നിക്കുന്ന ചിത്രങ്ങൾ ഓൺലൈനിൽ പങ്കുവെക്കുകയും മൂന്ന് പേർക്ക് കൂടി പരിക്കേറ്റതായും പറഞ്ഞു. അതേ സമയം അവർ പാക്കിസ്ഥാൻ പൗരന്മാരാണെന്നും അവരിൽ നാലുപേരെ തിരിച്ചറിഞ്ഞതായും അതിൽ കൊല്ലപ്പെട്ടവരെല്ലാം ഒരു ഓട്ടോ റിപ്പയർ ഷോപ്പിലെ തൊഴിലാളികളാണെന്നും പറഞ്ഞു.