തിരുവനന്തപുരം: മനുഷ്യന്റെ ആര്‍ത്തിയാണ് അഴിമതിക്ക് കാരണമാകുന്നതെന്ന് മുഖ്യമന്ത്രി പിണറായി വിജയന്‍. സമൂഹത്തില്‍ പലര്‍ക്കും വല്ലാത്ത ആര്‍ത്തിയാണ്. ഉള്ള വരുമാനം പോരാ, അതില്‍ക്കൂടുതല്‍ വരുമാനം വേണം എന്നു ചിന്തിക്കുന്ന ആളുകളാണ് അഴിമതിയുടെ ഭാഗമായി മാറുന്നതെന്നും മുഖ്യമന്ത്രി പറഞ്ഞു. സംസ്ഥാന സഹകരണ കോണ്‍ഗ്രസ് ഉദ്ഘാടനം ചെയ്യുകയായിരുന്നു മുഖ്യമന്ത്രി.
സംസ്ഥാനത്തു സഹകരണ മേഖല വലിയതോതില്‍ കരുത്താര്‍ജിച്ചപ്പോള്‍ ദുഷിച്ച ചില പ്രവണതകളും പലയിടത്തും ഉണ്ടാകുന്നു. അത്തരം ദുഷിച്ച പ്രവണതകള്‍ ഗൗരവമായി കാണണം. സഹകരണ മേഖലയില്‍ എല്ലാ കാര്യങ്ങളും കൂട്ടമായി നടക്കുന്നതുകൊണ്ടു വ്യക്തിപരമായി അഴിമതി നടത്താന്‍ അത്രകണ്ടു പറ്റില്ല. എന്നാല്‍ കുറെക്കാലം തുടരുമ്പോള്‍ ചിലര്‍ ദുഷിച്ച പ്രവണതയ്‌ക്ക് ഇരയാകുന്നുണ്ട്. ഏതെങ്കിലും ഒരു സ്ഥാപനത്തിനു ദുഷിപ്പ് ഉണ്ടായാല്‍ അത് ആ സ്ഥാപനത്തെ മാത്രമല്ല, കേരളത്തിന്റെ സഹകരണ മേഖലയുടെ വിശ്വാസ്യതയെയാണു ബാധിക്കുക്കുന്നതെന്നും മുഖ്യമന്ത്രി പറഞ്ഞു.
ഒരു സ്ഥാപനത്തില്‍ തെറ്റായ കാര്യങ്ങള്‍ നടന്നുവെന്ന് കരുവന്നൂര്‍ സഹകരണ ബാങ്കിന്റെ പേര് പറയാതെ മുഖ്യമന്ത്രി സമ്മതിച്ചു. സംസ്ഥാന സര്‍ക്കാരും എല്ലാ ഏജന്‍സികളും ഇടപെട്ടു. പുറത്തുനിന്നുള്ള ഏജന്‍സികള്‍ വന്നു ചെയ്തത് ആ സ്ഥാപനത്തിന്റെ വിശ്വാസ്യതയ്‌ക്ക് ഏറ്റവും കൂടുതല്‍ കോട്ടം തട്ടുന്ന രീതിയില്‍ ഇടപെട്ട ഒന്നാം പ്രതിയെ മാപ്പുസാക്ഷിയാക്കി.രാഷ്‌ട്രീയമായി ചിലരെ തേജോവധം ചെയ്യാനുള്ള പ്രചാരണത്തിനുള്ള കരുക്കള്‍ അയാളില്‍ നിന്ന് കിട്ടാനാണ് ശ്രമം.
കേരളത്തില്‍ വലിയ തോതിലുള്ള സ്വര്‍ണക്കള്ളക്കടത്തു നടന്നു. ആ സമയത്തും കുറ്റവാളികളെ കണ്ടെത്തുന്നതിനുള്ള ഫലപ്രദമായ ഇടപെടല്‍ ആവശ്യപ്പെട്ടു സംസ്ഥാന സര്‍ക്കാര്‍ പ്രധാനമന്ത്രിക്ക് കത്തെഴുതി. എന്നാല്‍, അതിന്റെ പിന്നീട് ഉണ്ടായ ഇടപെടല്‍ എന്താണെന്നു പറയുന്നില്ലന്നും ഇത് ഇന്ന് രാജ്യം നേരിടുന്ന ദുരവസ്ഥയാണെന്നും മുഖ്യമന്ത്രി പറഞ്ഞു.
പ്രതികരിക്കാൻ ഇവിടെ എഴുതുക: