ന്യൂദല്ഹി : ഇന്ത്യ ഓപ്പണ് ബാഡ്മിന്റണ് പുരുഷ ഡബിള്സില് ഇന്ത്യന് സഖ്യത്തെ പരാജയപ്പെടുത്തി ദക്ഷിണ കൊറിയക്ക് കിരീടം.ഫൈനലില് കാങ് മിന് ഹ്യൂക്ക്-സിയോ സിയോങ് ജേ സഖ്യം ഇന്ത്യയുടെ സാത്വിക് സായ്രാജ് രങ്കിറെഡ്ഡി-ചിരാഗ് ഷെട്ടി സഖ്യത്തെ തോല്പ്പിച്ചു. ഒരു മണിക്കൂറും അഞ്ച് മിനിറ്റും നീണ്ടുനിന്ന പോരാട്ടത്തില് 21-15, 11-21, 18-21 എന്ന സ്കോറിനാണ് ലോകചാമ്പ്യന് ജോഡികളായ കാങ് മിന് ഹ്യൂക്ക്-സിയോ സിയോങ് ജേ സഖ്യം ചാമ്പ്യന്മാരായത്.
രണ്ടാം തവണയും ഇന്ത്യ ഓപ്പണ് കിരീടമെന്ന സാത്വിക്-ചിരാഗ് കൂട്ടുകെട്ടിന്റെ സ്വപ്നമാണ് പൊലിഞ്ഞത്. 2022ല് ഇന്ത്യ ഓപ്പണ് കിരീടം ഇന്ത്യന് ജോഡി നേടിയിരുന്നു. ഇന്ത്യ ഓപ്പണിന്റെ പുരുഷ ഡബിള്സില് സാത്വിക്-ചിരാഗ് ഒഴികെ ഒരു ഇന്ത്യന് ജോഡിക്കും ഇതുവരെ കിരീടം നേടാന് കഴിഞ്ഞിട്ടില്ല.
നേരത്തെ, ചൈനയുടെ ഷി യു ക്വി ഹോങ്കോങ്ങിന്റെ ലീ ച്യൂക് യിയുവിനെ പരാജയപ്പെടുത്തി പുരുഷ സിംഗിള്സ് കിരീടം നേടി. ചൈനയുടെ ചെന് യു ഫെയിയെ തോല്പ്പിച്ച് ചൈനീസ് തായ്പേയിയുടെ തായ് സു യിംഗ് വനിതാ സിംഗിള്സ് കിരീടം നേടി.
