ന്യൂദൽഹി : ദൽഹിയടക്കമുള്ള ഉത്തരേന്ത്യൻ സംസ്ഥാനങ്ങളിൽ അതിശൈത്യവും മൂടൽ മഞ്ഞും ശക്തമാകുന്നു. ഇത് ട്രെയിൻ ഗതാഗതത്തെയും സാരമായി ബാധിച്ചു. ഇന്നലെ രാവിലെ മൂടൽ മഞ്ഞിൽ ദൂരക്കാഴ്‌ച പൂജ്യം മീറ്ററായതോടെ ദൽഹിയിൽ എത്തേണ്ട 11 ദീർഘദൂര ട്രെയിനുകൾ വൈകിയെന്നാണ് റിപ്പോർട്ട്.
ഇതിനു പുറമെ സമാനമായി തുടർച്ചായ ആറാം ദിവസവും ദൽഹി വിമാനത്താവളത്തിലും നിരവധി സർവീസുകളെ മൂടൽ മഞ്ഞ്‌ ബാധിച്ചു. ദൽഹിയിൽ ഇന്ന് മഞ്ഞ അലർട്ടാണ്‌ പ്രഖ്യാപിച്ചിരിക്കുന്നത്‌. ദേശീയ തലസ്ഥാനത്ത് ഏറ്റവും കുറഞ്ഞ താപനില ഏഴ് ഡിഗ്രിയും ഉയർന്ന താപനില 15 ഡിഗ്രിയുമാണ്‌ രേഖപ്പെടുത്തിയത്‌. അടുത്ത അഞ്ചുദിവസവും ഉത്തരേന്ത്യയിൽ താപനില സംബന്ധിച്ച വർധനയുണ്ടാകില്ലന്ന്‌ കേന്ദ്രകാലാവസ്ഥ നിരീക്ഷണകേന്ദ്രം അറിയിച്ചു.
ദൽഹിക്ക്‌ പുറമേ ഹരിയാന, പഞ്ചാബ്‌, ഹിമാചൽ, ഉത്തരാഖണ്ഡ്‌, യുപി, രാജസ്ഥാൻ, ബിഹാർ തുടങ്ങിയ സംസ്ഥാനങ്ങളിലും വരും ദിവസങ്ങളിൽ തണുപ്പ്‌ വർധിക്കും. കിഴക്കൻ ഭാരതത്തിന്റെ പല ഭാഗങ്ങളിലും കുറഞ്ഞ താപനിലയിൽ 2-3 ഡിഗ്രി സെൽഷ്യസ് കുറവുണ്ടാകുമെന്നും മുന്നറിയിപ്പുണ്ട്‌.
പ്രതികരിക്കാൻ ഇവിടെ എഴുതുക: