തിരുവനന്തപുരം: ഇലക്ട്രിക് ബസുകള് ലാഭകരമല്ലെന്നും ഇലക്ട്രിക് ബസ് വാങ്ങുന്നതിനോട് യോജിപ്പില്ലെന്നും പ്രതികരിച്ച പുതുതായി ചുമതലയേറ്റ ഗതാഗത മന്ത്രി കെ.ബി ഗണേഷ് കുമാറിനെതിരെ പരോക്ഷ വിമര്ശനവുമായി തിരുവനന്തപുരം മുന് മേയറും വട്ടിയൂര്ക്കവ് എം എല് എയുമായ വി കെ പ്രശാന്ത്.ഇലക്ട്രിക്ക് ബസുകള് നയപരമായ തീരുമാനമാണ്. മലിനീകരണം കുറയ്ക്കാനാണ് ഇലക്ട്രിക്ക് ബസുകളെന്നും എം എല് എ ഫേസ്ബുക്കില് കുറിച്ചു.
‘തിരുവനന്തപുരം സോളാര് നഗരമാക്കാനും ഭൂരിഭാഗം ബസുകളും ഇലക്ട്രിക് ആക്കി മലിനീകരണം കുറയ്ക്കാനും നയപരമായി തീരുമാനിച്ചാണ് ഇലക്ട്രിക് ബസുകള് നിരത്തിലിറക്കിയത്. ഇതിനെ നഗരവാസികള് ഇതിനോടകം സ്വീകരിച്ചിട്ടുണ്ട്. ഇത് ലാഭകരമാക്കാനും കൃത്യമായ മെയിന്റനന്സ് സംവിധാനം ഒരുക്കുകയുമാണ് കെ എസ് ആര് ടി സി ചെയ്യേണ്ടത്’- വി.കെ പ്രശാന്ത് ഫേസ്ബുക്കില് കുറിച്ചു.
പുതിയ ഇ-ബസുകള് വാങ്ങില്ലെന്ന് മന്ത്രി പറഞ്ഞതോടെ തിരുവനന്തപുരം നഗരത്തെ സംസ്ഥാനത്തെ ആദ്യ ഹരിതനഗരമാക്കാനുള്ള പദ്ധതി അനിശ്ചിതത്വത്തിലായി. ഇലക്ട്രിക് ബസ് വാങ്ങുന്ന തുകയ്ക്ക് നാല് ഡീസല് ബസുകള് വാങ്ങാം.ഇലക്ട്രിക് ബസുകളില് കുറച്ച് യാത്രക്കാര്ക്ക് മാത്രമേ സഞ്ചരിക്കാന് കഴിയൂ. സുശീല് ഘന്ന റിപ്പോര്ട്ട് നടപ്പാക്കാന് ശ്രമിക്കും. ഇലക്ട്രിക് ബസിന് ദീര്ഘകാല പ്രവര്ത്തന ക്ഷമത കുറവാണെന്നും ഇലക്ട്രിക് ബസുകള് വിജയകരമായി ഉപേയാഗിക്കപ്പെട്ടതായി എവിടെയും തെളിയിക്കപ്പെട്ടിട്ടില്ലെന്നും മന്ത്രി കെ എസ് ആര് ടി സിയിലെ തൊഴിലാളി സംഘടകളുമായി നടത്തിയ ചര്ച്ചയ്ക്കും ശേഷം പറഞ്ഞിരുന്നു.
