ദോഹ: എഎഫ്സി ഏഷ്യന് കപ്പ് ഫുട്ബോളില് ഇന്ത്യക്ക് തുടര്ച്ചയായ രണ്ടാം തോല്വി. വ്യാഴാഴ്ച നടന്ന മത്സരത്തില് ഉസ്ബകിസ്ഥാനോടും ഇന്ത്യ തോറ്റു. അഹമ്മദ് ബിന് അലി സ്റ്റേഡിയത്തില് എതിരില്ലാത്ത മൂന്ന് ഗോളിനാണ് ഉസ്ബെക്കിസ്ഥാന്റെ വിജയം. ഇതോടെ ഇന്ത്യയുടെ പ്രി ക്വാട്ടര് സാധ്യത മങ്ങി.
ആദ്യ പകുതിയാലാണ് ഉസ്ബകിസ്ഥാന് മൂന്ന് ഗോളും നേടിയത്. കിക്കോഫ് ചെയ്ത് നാലാം മിനിറ്റില് തന്നെ ഇന്ത്യ ഗോള് വഴങ്ങി.അബ്ബോസ്ബേക് ഫായ്സുല്ലോവ് ഉസ്ബെക്കിസ്ഥാനെ മുന്നിലെത്തിച്ചു. 18-ാം മിനുറ്റില് ഇഗോര് സെര്ഗീവ് ഇന്ത്യക്ക് രണ്ടാം പ്രഹരം നല്കി.
ആദ്യപകുതിയുടെ ഇഞ്ചുറിടൈമില് (45+4) ഷെര്സോദ് നാസ്റുല്ലോവ് ലക്ഷ്യം കണ്ടതോടെ ഇന്ത്യ മൂന്ന് ഗോളിന് പിന്നിലായി. രണ്ടാം പകുതിയില് ഗോള് നേടാന് ഇന്ത്യ കിണഞ്ഞ് ശ്രമിച്ചെങ്കിലും ഫലമുണ്ടായില്ല
