കോഴിക്കോട് : കൂടത്തായി റോയ് വധക്കേസില് ഒരു സാക്ഷി കൂടി പ്രതിക്ക് അനുകൂലമായി കൂറുമാറി. ജോളിക്ക് സയനൈഡ് എത്തിച്ച് കൊടുത്ത സ്വര്ണപ്പണിക്കാരന് പ്രജി കുമാറിന്റെ ഭാര്യയും കേസിലെ അറുപതാം സാക്ഷിയുമായ ശരണ്യയാണ് കോടതിയില് പ്രതികള്ക്കനുകൂലമായി കൂറുമാറിയത്.
പ്രജി കുമാറിന്റെ താമരശ്ശേരിയിലെ ദൃശ്യകല ജൂവലറിയില് നിന്ന് സയനൈഡ് കണ്ടെടുത്തതിന്റെ സാക്ഷിയാണ് ശരണ്യ. രണ്ടാം പ്രതി എം.എസ്. മാത്യൂ, പ്രജി കുമാറിന്റെ സുഹൃത്താണെന്നും കടയില് സ്വര്ണപ്പണിക്ക് സയനൈഡ് ഉപയോഗിക്കാറുണ്ടെന്നും ശരണ്യ നേരത്തെ മൊഴി നല്കിയിരുന്നു. കേസില് ഇതുവരെ ആറ് പേരാണ് കോടതിയില് മൊഴിമാറ്റിയത്.
ജോളിയുടെ ഭര്ത്തൃമാതാവ് അന്നമ്മ തോമസ് ഉള്പ്പെടെ ഭര്ത്താവിന്റെ കുടുംബത്തിലെ ആറ് പേരെയാണ് ജോളി കൊലപ്പെടുത്തിയത്. 2019 ലാണ് കേരളത്തെ നടുക്കിയ കൊലപാതകങ്ങളുടെ വിവരം പുറത്തറിഞ്ഞത്. കൂടത്തായി പൊന്നാമറ്റം തറവാട്ടില് 2002 മുതല് 2016 വരെയുള്ള കാലയളവിലായി ആറ് പേരാണ് കൊല്ലപ്പെട്ടത്. റിട്ട. അധ്യാപികയായ അന്നമ്മ തോമസിന്റെ മരണം ആയിരുന്നു കൊലപാതക പരമ്പരയില് ആദ്യത്തേത്. ആട്ടിന് സൂപ്പ് കഴിച്ചതിന് പിന്നാലെ അന്നമ്മ കുഴഞ്ഞു വീണ് മരിക്കുകയായിരുന്നു. പിന്നീട് അന്നമ്മയുടെ ഭര്ത്താവ് ടോം തോമസും മകന് റോയ് തോമസും സമാന സാഹചര്യത്തില് മരിച്ചു.
പിന്നാലെ അന്നമ്മയുടെ സഹോദരന് എം.എം മാത്യു, ടോം തോമസിന്റെ സഹോദരന്റെ മകന് ഷാജുവിന്റെ ഒരു വയസ്സുള്ള മകള് ആല്ഫൈന്, ഷാജുവിന്റെ ഭാര്യ ഫിലി എന്നിവരും മരിച്ചു. ആറു മരണങ്ങളിലും ദുരൂഹതയുണ്ടെന്ന സ്പെഷ്യല് ബ്രാഞ്ച് സബ് ഇന്സ്പെക്ടര് ജീവന് ജോര്ജിന്റെ റിപ്പോര്ട്ടാണ് കേസില് വഴിത്തിരിവായത്. തുടര്ന്ന് നടത്തിയ അന്വേഷണത്തില് ആറു മരണങ്ങളും കൊലപാതകമെന്ന് പൊലീസ് കണ്ടെത്തുകയായിരുന്നു
