ബെംഗളൂരു : അയോധ്യ പ്രതിഷ്ഠാ ദിനത്തോടനുബന്ധിച്ച് കര്ണ്ണാടകയിലെ ക്ഷേത്രങ്ങളില് പ്രത്യേക പൂജ നടത്തും. സംസ്ഥാന സര്ക്കാര് ഇതുസംബന്ധിച്ച നിര്ദ്ദേശം ക്ഷേത്ര അധികാരികള്ക്ക് നല്കി കഴിഞ്ഞു. കര്ണ്ണാടക ദേവസ്വംമന്ത്രി രാമലിംഗ റെഡ്ഡി ഇതുസംബന്ധിച്ച് ഉത്തരവിറക്കി.
ജനുവരി 22-ന് അയോധ്യയിലെ പ്രതിഷ്ഠാചടങ്ങ് നടക്കുന്ന ദിവസം പകല് 12.29 മുതല് 12.32 വരെയുള്ള സമയം ദേവസ്വം ബോര്ഡിന്റെ കീഴിലുള്ള ക്ഷേത്രങ്ങളില് പ്രത്യേക പൂജകള് നടത്തണമെന്നാണ് ഉത്തരവില് പറയുന്നത്. വിശ്വഹിന്ദു പരിഷത്ത് ഉള്പ്പെടെയുള്ള ഹിന്ദു സംഘടനകളുടെ നേതൃത്വത്തില് കര്ണ്ണാടകയിലെ മറ്റുക്ഷേത്രങ്ങളില് പൂജ ഉള്പ്പടെ വിപുലമായ പരിപാടികള് നടത്താന് തീരുമാനിച്ചിട്ടുണ്ട്.
അതേസമയം, രാമക്ഷേത്രത്തിലെ ചടങ്ങില് പങ്കെടുക്കുന്നത് സംബന്ധിച്ച് ദേശീയതലത്തിലും വിവിധ സംസ്ഥാനങ്ങളിലും വാഗ്വാദങ്ങള് നടക്കുന്നുണ്ട്. അതിനിടെയാണ് കോണ്ഗ്രസ് ഭരിക്കുന്ന ഒരുസര്ക്കാര് സംസ്ഥാനത്ത് പ്രത്യേക പൂജയ്ക്ക് ആഹ്വാനം ചെയ്തിരിക്കുന്നത്.
