തിരുവനന്തപുരം: കെഎസ്‌യു സംസ്ഥാന കൺവീനർ അൻസിൽ ജലീലിനെതിരായ വ്യാജ സര്‍ട്ടിഫിക്കറ്റ് ആരോപണത്തില്‍ ക്ലീന്‍ ചിറ്റ് നല്‍കി പൊലീസ്. സിപിഐഎം മുഖപത്രമായ ദേശാഭിമാന തന്നെയാണ് നേരത്തെ അന്‍സില്‍ ജലീലിന്‍റേത് വ്യാജസര്‍ട്ടിഫിക്കറ്റാണെന്ന് ആരോപിച്ച് വാര്‍ത്ത നല്‍കിയിരുന്നത്. എന്നാല്‍ ഈ വാര്‍ത്തയില്‍ കഴമ്പില്ലെന്ന് കാണിച്ച് പൊലീസ് തിരുവനന്തപുരം ജെ.എഫ്.സി.എം കോടതിയിൽ റിപ്പോർട്ട് സമർപ്പിച്ചിരിക്കുകയാണ്. .
ദേശാഭിമാനിയിൽ വാർത്ത വന്നതിനെ തുടര്‍ന്ന് കേരള സര്‍വ്വകലാശാലക്ക് ലഭിച്ച പരാതിയിലായിരുന്നു പൊലീസിന്റെ അന്വേഷണം. എസ് എഫ് ഐ നേതാവ് നിഖിൽ തോമസിന്റെ വ്യാജ സർട്ടിഫിക്കറ്റ് സംബന്ധിച്ച് വാര്‍ത്ത വന്നതോടെ എസ്.എഫ്.ഐ പ്രതിക്കൂട്ടിലായിരുന്നു. അതിന് പിന്നാലെയാണ് ദേശാഭിമാനിയില്‍ കെ.എസ്.യു നേതാവ് അന്‍സില്‍ ജലീലിനെതിരെ റിപ്പോർട്ട് വന്നത്. കേരള സര്‍വകലാശാലയുടെ ബി.കോം ബിരുദ സര്‍ട്ടിഫിക്കറ്റ് വ്യാജമായി നിര്‍മിച്ചെന്നായിരുന്നു അന്‍സിലിനെതിരായ കേസ്.
കന്റൊൺമെന്‍റ് പൊലീസായിരുന്നു കേസില്‍ അന്വേഷണം നടത്തിയത്. എന്നാല്‍ വ്യാജ സര്‍ട്ടിഫിക്കറ്റ് കണ്ടെത്താന്‍ കഴിഞ്ഞില്ലെന്ന് പൊലീസ് പറയുന്നു. അൻസിൽ ജലീൽ പഠിച്ച വിദ്യാഭ്യാസ സ്ഥാപനങ്ങളിലും ജോലി ചെയ്തുവരുന്ന സ്ഥാപനത്തിലും പിഎസ്‌സി ഓഫീസിലും എംപ്ലോയ്മെൻറ് എക്സ്ചേഞ്ചിലും വിശദമായ അന്വേഷണം നടത്തി. എന്നാല്‍ ജോലി സമ്പാദിച്ചതിന് വ്യാജസര്‍ട്ടിഫിക്കറ്റ് ഉപയോഗിച്ചതായി തെളിവില്ലെന്നും കേസ് കെട്ടിച്ചമച്ചതാണെന്നുമാണ് പൊലീസ് കണ്ടെത്തല്‍. ദേശാഭിമാനി വാർത്ത അടിസ്ഥാന രഹിതമാണെന്നും പൊലീസ് റിപ്പോർട്ടിൽ പറയുന്നു.
പ്രതികരിക്കാൻ ഇവിടെ എഴുതുക: