ന്യൂഡല്‍ഹി: ഖത്തറില്‍ ജയിലിലുള്ള ഇന്ത്യന്‍ നാവിക സേനയിലെ മുന്‍ ഉദ്യോഗസ്ഥര്‍ക്ക് കോടതി വിധിക്കെതിരെ അപ്പീല്‍ നല്‍കാന്‍ 60 ദിവസം സമയമുണ്ടെന്ന് കേന്ദ്ര സര്‍ക്കാര്‍. ചാരവൃത്തി ആരോപിച്ച് നേരത്തേ വിധിച്ചിരുന്ന വധശിക്ഷ റദ്ദാക്കിയ ഖത്തര്‍ കോടതി, പലര്‍ക്കും പല കാലയളവിലേക്കുള്ള ജയില്‍ ശിക്ഷയാണ് വിധിച്ചിരിക്കുന്നത്.
ഒക്ടോബറിലാണ് ഖത്തറിലെ വിചാരണ കോടതി ഒരു മലയാളി ഉള്‍പ്പെടെ എട്ട് പേര്‍ക്ക് വധശിക്ഷ വിധിച്ചത്. ശിക്ഷിക്കപ്പെട്ട മുന്‍ നാവികരുടെ കുടുംബം നല്‍കിയ അപ്പീലില്‍ ഡിസംബര്‍ 28ന് വധശിക്ഷ റദ്ദാക്കി. എന്നാല്‍ ഓരോത്തര്‍ക്കും വ്യത്യസ്ത കാലയളവിലുള്ള ജയില്‍ ശിക്ഷ വിധിച്ചു. ശിക്ഷാ വിധിയുടെ പകര്‍പ്പ് അവരുടെ അഭിഭാഷക സംഘത്തിന് ലഭിച്ചതായി വിദേശകാര്യ മന്ത്രാലയ വക്താവ് അറിയിച്ചു.
ഇനി അപ്പീല്‍ നല്‍കാനുള്ളത് ഖത്തറിലെ പരമോന്നത കോടതിയിലാണ്. ഇതിന് 60 ദിവസത്തെ സമയം അനുവദിച്ചിട്ടുണ്ട്. ഇക്കാര്യത്തില്‍ അഭിഭാഷകരുടെ സംഘമാണ് തുടര്‍ നടപടികള്‍ കൈക്കൊള്ളുന്നത്. ജയിലിലുള്ള ഇന്ത്യക്കാരുടെ കുടുംബവുമായും ഖത്തറിലെ അഭിഭാഷക സംഘവുമായും ബന്ധപ്പെടുന്നുണ്ടെന്ന് വിദേശ മന്ത്രാലയം അറിയിച്ചു.
മൂന്ന് വര്‍ഷം മുതല്‍ 25 വര്‍ഷം വരെയാണ് എട്ട് ഇന്ത്യക്കാര്‍ക്കും തടവ് ശിക്ഷ ലഭിച്ചതെന്നാണ് റിപ്പോര്‍ട്ട്. അല്‍ ദഹ്‌റ എന്ന സ്വകാര്യ കമ്പനിയില്‍ ജോലി ചെയ്തിരുന്ന ഇവര്‍ ഇസ്രായേലിന് വേണ്ടി ചാരപ്രവര്‍ത്തനം നടത്തിയെന്നാണ് കേസെന്നാണ് സൂചന.
പ്രതികരിക്കാൻ ഇവിടെ എഴുതുക: