ആലപ്പുഴ: അയ്യപ്പന്റെ മാതൃസ്ഥാനീയരായ അമ്പലപ്പുഴ ദേശക്കാരുടെ ശബരിമല തീര്‍ത്ഥാടനത്തിന്റെ ഭാഗമായ യാത്ര ഏഴിന് പുറപ്പെടും. എരുമേലി പേട്ടതുള്ളലിന് എഴുന്നള്ളിക്കാനുള്ള തങ്കത്തിടമ്പ് പ്രത്യേകം തയാറാക്കി അലങ്കരിച്ച രഥത്തില്‍ എഴുന്നള്ളിച്ചാണ് യാത്ര ആരംഭിക്കുന്നത്. രഥത്തിനു പിന്നാലെ ഇരുമുടിക്കെട്ടേന്തിയ സ്വാമിമാരും മാളികപ്പുറങ്ങളും നടന്നു നീങ്ങും. ദേവസ്വം ബോര്‍ഡിന്റെ നിയന്ത്രണങ്ങള്‍ക്ക് വിധേയമായി 250 പേരാണ് യാത്രയില്‍ പങ്കെടുക്കുന്നത്.
അമ്പലപ്പുഴയിലെ വിവിധ കരകളിലെ കരപ്പെരിയോന്മാരുടെ കാര്‍മ്മികത്വത്തില്‍ ശനിയാഴ്ച രാത്രിയില്‍ ഇരുമുടിക്കെട്ട് നിറച്ച് സ്വാമിഭക്തര്‍ അമ്പലപ്പുഴ ക്ഷേത്രത്തില്‍ എത്തും. ഞായറാഴ്ച പ്രഭാത ശീവേലിക്കുശേഷം കിഴക്കേ ഗോപുര നടയില്‍ മേല്‍ശാന്തികണ്ണമംഗലം കേശവന്‍ നമ്പൂതിരിയുടെ മുഖ്യ കാര്‍മ്മികത്വത്തില്‍ തിടമ്പ് പൂജ ആരംഭിക്കും. ഏഴിന് പൂജിച്ച തിടമ്പ് സമൂഹപെരിയോന്‍ എന്‍. ഗോപാലകൃഷ്ണപിള്ളയ്‌ക്ക് കൈമാറും. തിടമ്പ് രഥത്തില്‍ സ്ഥാപിച്ച് യാത്ര ആരംഭിക്കും. മുന്‍ സമൂഹ പെരിയോനും രക്ഷാധികാരിയുമായ കളത്തില്‍ ചന്ദ്രശേഖരന്‍ നായര്‍ സംഘത്തെ യാത്രയാക്കും.
12 നാണ് ചരിത്ര പ്രസിദ്ധമായ എരുമേലി പേട്ട തുള്ളല്‍. ഉച്ചയ്‌ക്ക് പന്ത്രണ്ടോടെ അമ്പലപ്പുഴ പാര്‍ത്ഥസാരഥിയുടെ സാന്നിദ്ധ്യമറിയിച്ച് മാനത്ത് വട്ടമിട്ടുപറക്കുന്ന ശ്രീകൃഷ്ണപ്പരുന്തിനെ ദര്‍ശിക്കുന്നതോടെ വാദ്യമേളങ്ങളുടെ അകമ്പടിയോടെ പേട്ടതുള്ളല്‍ ആരംഭിക്കും. 14ന് പമ്പ സദ്യ നടത്തി മല കയറുന്ന സംഘത്തെ മരക്കൂട്ടത്തില്‍ സ്വീകരിച്ച് വരി നില്‍ക്കാതെ പടികയറുന്നതിനും ദര്‍ശനത്തിനും ദേവസ്വം ബോര്‍ഡ് ക്രമീകരണം ചെയ്യും.
16ന് വൈകിട്ട് മാളികപ്പുറം മണിമണ്ഡപത്തില്‍ നിന്നും പതിനെട്ടാം പടിയിലേക്ക് ശീവേലി എഴുന്നള്ളത്തും തുടര്‍ന്ന് പടിയില്‍ കര്‍പ്പൂരാരതിയും നടത്തി, തിരുവാഭരണം ചാര്‍ത്തിയ വിഗ്രഹം ദര്‍ശിച്ച് പത്ത് നാള്‍ നീളുന്ന തീര്‍ത്ഥാടനത്തിന് സമാപനം കുറിച്ച് സംഘം മലയിറങ്ങും.
പ്രതികരിക്കാൻ ഇവിടെ എഴുതുക: