കണ്ണൂരിൽ ആക്രിസാധനങ്ങൾ തരം തിരിക്കുന്നതിനിടെ സ്‌ഫോടനം; മൂന്നു പേർക്ക് പരിക്ക്, ഒരാളുടെ കൈയ്‌ക്കും കണ്ണിനും ഗുരുതര പരിക്ക്

കണ്ണൂർ: മൂഴിവയലിൽ ആക്രി സാധനങ്ങൾ തരം തിരിക്കുന്നതിനിടെ സ്‌ഫോടനം. സംഭവത്തിൽ മൂന്ന് പേർക്ക് പരിക്കേറ്റു. അസം സ്വദേശിയായ സായിദ് അലിക്കും രണ്ട് കുട്ടികൾക്കുമാണ് പരിക്കേറ്റത്. ഇവരെ ആശുപത്രിയിൽ പ്രവേശിപ്പിച്ചതായി ബന്ധുക്കൾ പറഞ്ഞു. അപകടത്തിൽ സായിദ് അലിയുടെ കൈയ്‌ക്കും കണ്ണിനും ഗുരുതരമായി പരിക്കേറ്റു. കുട്ടികളുടെ പരിക്ക് സാരമുള്ളതല്ലെന്ന് ഡോക്ടർമാർ അറിയിച്ചു.

കതിരൂർ പാട്യം മൂഴിവയലിൽ ആക്രി സാധനങ്ങൾ ശേഖരിക്കുന്ന 8 പേരടങ്ങുന്ന ഇതര സംസ്ഥാനത്തൊഴിലാളികൾ വീട് വാടകയ്‌ക്കെടുത്താണ് നിന്നിരുന്നത്. ഇവർ ശേഖരിച്ച ആക്രി സാധനങ്ങളിലുണ്ടായിരുന്ന കുപ്പി തുറക്കുന്നതിനിടെ പൊട്ടിത്തെറിക്കുകയായിരുന്നു.

സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.