കാലിഫോര്ണിയ: അമേരിക്കയില് കാലിഫോര്ണിയയിലെ ഹിന്ദു ക്ഷേത്രത്തിന്റെ മതില് ഖാലിസ്ഥാന് അനുകൂലികള് വികൃതമാക്കി. വ്യാഴാഴ്ച രാത്രി നെവാര്ക്ക് നഗരത്തിലാണ് സംഭവം. സംഭവത്തെ ശക്തമായി അപലപിച്ച ഇന്ത്യ ഉടന് നടപടി വേണമെന്ന് അമേരിക്കന് അധികൃതരോട് ആവശ്യപ്പെട്ടു.
ക്ഷേത്രമതിലില് കറുത്ത മഷിയില് ഹിന്ദു വിരുദ്ധ, ഇന്ത്യാ വിരുദ്ധ മുദ്രാവാക്യങ്ങള് എഴുതി വച്ചിരിക്കുന്നത് ഭകതരില് ഒരാളാണ് ആദ്യം കണ്ടത്.ഉടന് തന്നെ പ്രാദേശിക ഭരണകൂടത്തെ വിവരമറിയിച്ചു.
പ്രധാനമന്ത്രി നരേന്ദ്രമോദിക്കെതിരെയും വിദ്വേഷ വാചകങ്ങള് മതിലില് എഴുതിയിട്ടുണ്ട്. ക്ഷേത്ര മതില് വികൃതമാക്കിയതിന്റെ ചിത്രങ്ങള് ഹിന്ദു -അമേരിക്കന് ഫൗണ്ടേഷന് എക്സില് പങ്കുവച്ചിട്ടുണ്ട്.
‘കാലിഫോര്ണിയയിലെ നെവാര്ക്കിലുള്ള എസ്എംവിഎസ് ശ്രീ സ്വാമിനാരായണ ക്ഷേത്ര മതില് ഇന്ത്യാ വിരുദ്ധ ചുവരെഴുത്തുകള് ഉപയോഗിച്ച് വികൃതമാക്കിയതിനെ ഞങ്ങള് ശക്തമായി അപലപിക്കുന്നു. ഈ സംഭവം ഇന്ത്യന് സമൂഹത്തിന്റെ വികാരങ്ങളെ വ്രണപ്പെടുത്തിയിരിക്കുന്നു. ദ്രുതഗതിയിലുള്ള അന്വേഷണവും വേഗത്തിലുള്ള നടപടിയും വേണമെന്ന് യുഎസ് അധികാരികളോട് ആവശ്യപ്പെട്ടിട്ടുണ്ട്- സാന് ഫ്രാന്സിസ്കോയിലെ ഇന്ത്യന് കോണ്സുലേറ്റ് ജനറല് എക്സില് കുറിച്ചു.
യുഎസില് ഒരു ഹിന്ദു ക്ഷേത്രം വികൃതമാക്കുന്നത് ഇതാദ്യമായല്ല. രാജ്യത്തും അയല്രാജ്യമായ കാനഡയിലും ഇത്തരം സംഭവങ്ങള് മുമ്പും ഉണ്ടായിട്ടുണ്ട്. ഇന്ത്യന് വംശജനും ഖാലിസ്ഥാന് തീവ്രവാദിയുമായ ഗുര്പത്വന്ത് സിംഗ് പന്നൂനെ അമേരിക്കന് മണ്ണില് വധിക്കാന് ഇന്ത്യന് ഏജന്റുമാര് ശ്രമിച്ചെന്ന അമേരിക്കന് അധികൃതരുടെ ആരോപണത്തിന് പിന്നാലെയാണ് ക്ഷേത്രമതില് വികൃതമാക്കിയ സംഭവം.
