തിരുവനന്തപുരം: കോവളത്ത് ജ്യൂസിൽ മദ്യം ചേർത്ത് യുവതിയെ കുടിപ്പിച്ച് മയക്കി ലൈംഗികമായി ഉപദ്രവിച്ച കേസിൽ രണ്ട് പേർ അറസ്റ്റിൽ. യുവതിയുടെ കൂട്ടുകാരിയെയും ആൺ സുഹൃത്തിനെയുമാണ് അറസ്റ്റ് ചെയ്തത്. എറണാകുളത്തെ സ്വകാര്യ ആശുപത്രിയിൽ ജോലി ചെയ്ത യുവതിയെയാണ് കോവളത്തെ സ്വകാര്യ ഹോട്ടലിൽ പീഡനത്തിന് ഇരയാക്കിയത്.
കോവളത്തെ സ്വകാര്യ ആയുർവേദ ആശുപത്രിയിൽ തെറാപ്പിസ്റ്റായി ജോലി ചെയ്തിരുന്ന മലപ്പുറം സ്വദേശി ശരത് ഇയാളുടെ പെൺ സുഹൃത്ത് മണ്ണാർക്കാട് സ്വദേശി സൂര്യ എന്നിവരെയാണ് പോലീസ് അറസ്റ്റ് ചെയ്തത്. ഈ കഴിഞ്ഞ 17-നായിരുന്നു കേസിന് ആസ്പദമായ സംഭവം.
ശ്രീപദ്മനാഭ സ്വാമി ക്ഷേത്രത്തിൽ ദർശനം നടത്താമെന്ന് പറഞ്ഞായിരുന്നു യുവതിയെ സൂര്യ കോവളത്തേക്ക് എത്തിച്ചത്. സൂര്യയുടെ ആൺസുഹൃത്തായ ശരത് ഇവർക്ക് കോവളത്ത് ഹോട്ടലിൽ മുറിയെടുത്ത് നൽകി. ശരത് മദ്യവുമായി എത്തി ജ്യൂസിൽ മദ്യം ചേർത്ത് നിർബന്ധിച്ച് യുവതിയെ കുടിപ്പിച്ചു. അർധബോധാവസ്ഥയിലായ യുവതിയെ ശരത് പീഡനത്തിനിരയാക്കിയെന്നാണ് പരാതി.
