മണ്ഡലകാലം; സന്നിധാനത്ത് ഭക്തജനത്തിരക്കേറുന്നു; പതിനെട്ടാം പടി കയറുന്നതിനുള്ള ക്യൂ ശബരിപീഠം വരെ

പത്തനംതിട്ട: മണ്ഡലപൂജയ്‌ക്ക് ദിവസങ്ങൾ മാത്രം ബാക്കിനിൽക്കെ മൂന്നാം ദിനവും സന്നിധാനത്ത് വലിയ തിരക്ക്. 90,000 അയ്യപ്പ ഭക്തരാണ് ഇന്ന് വെർച്വൽ ക്യൂ മുഖേന ബുക്ക് ചെയ്തിരിക്കുന്നത്. ഇന്നലെ വെർച്വൽ ക്യൂ ബുക്കിംഗ് 80,000-ൽ താഴെയായിരുന്നു.

ചൊവ്വാഴ്ച രാത്രി നട അടയ്‌ക്കുന്ന വേളയിൽ പതിനെട്ടാം പടി കയറുന്നതിനുള്ള ക്യൂ ശബരീപീഠം വരെയായിരുന്നു. ഈ ദിവസങ്ങളിൽ 16 മണിക്കൂർ വരെ ക്യൂവിൽ നിന്നാണ് ഭക്തർ ദർശനം നടത്തിയത്. പമ്പയിൽ തടഞ്ഞു നിർത്തിയവർ, വഴികളിൽ വാഹനങ്ങൾ പിടിച്ചിട്ടതു മൂലം കുടുങ്ങിയവർ തുടങ്ങി എല്ലാവരും ഇന്നലെ പുലർച്ചെ ദർശനത്തിനെത്തി.

കൂടാതെ ഇന്നലെ ബുക്ക് ചെയ്തവരും സന്നിധാനത്തെത്തി. ഇത് തിരക്ക് വർദ്ധിക്കുന്നതിന് കാരണമായി. പടി കയറുന്നതിനുള്ള തിരക്ക് ഇന്നലെ വൈകിട്ട് അപ്പാച്ചിമേട് മുകൾഭാഗം വരെയും നീണ്ടു.