ആലപ്പുഴ: ഭീകരര്‍ക്ക് വളരാനുള്ള മണ്ണ് കേരളത്തില്‍ ഒരുക്കുവാന്‍ ദേശദ്രോഹികള്‍ക്ക് കഴിയുന്നത് കമ്മ്യൂണിസ്റ്റ് പാര്‍ട്ടികളുടെ പിന്‍തുണ ഉള്ളതുകൊണ്ടാണെന്ന് ബിജെപി സംസ്ഥാന പ്രസിഡന്റ് കെ. സുരേന്ദ്രന്‍. പോപ്പുലര്‍ഫ്രണ്ടുകാര്‍ കൊലപ്പെടുത്തിയ ഒബിസി മോര്‍ച്ച സംസ്ഥാന സെക്രട്ടറിയായിരുന്ന അഡ്വ. രണ്‍ജീത് ശ്രീനിവാസന്റെ രണ്ടാം ബലിദാന ദിനാചരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
സമൂഹത്തില്‍ അശാന്തിയും ഭീകരതയും പടര്‍ത്താനുള്ള തീവ്രവാദികളുടെ ഒടുവിലത്തെ ഉദാഹരണമാണ് രണ്‍ജീത്തിന്റെ കൊലപാതകം.
ഇതരമതസ്ഥനെ കൊന്നാല്‍ സ്വര്‍ഗം കിട്ടുമെന്ന് പ്രചരിപ്പിച്ച് നടത്തുന്ന ഇത്തരം പ്രവര്‍ത്തനങ്ങള്‍ക്ക് ഇടതു വലതു മുന്നണികള്‍ പിന്‍തുണയും നല്‍കുന്നു. സിപിഎമ്മില്‍ പുതിയതായി ചേരുന്നവര്‍ പിഎഫ്‌ഐക്കാരാണെന്ന് പാര്‍ട്ടി സഖാക്കള്‍ തന്നെ പറയുന്നു. മോദി സര്‍ക്കാര്‍ വന്നതിനു ശേഷം 2014 മുതല്‍ ദക്ഷിണ ഭാരതത്തില്‍ നടന്നുവരുന്ന ദേശദ്രോഹ പ്രവര്‍ത്തനങ്ങള്‍ നിരീക്ഷിച്ചുവരികയാണ്. ദേശദ്രോഹം കമ്യൂണിസ്റ്റ് പാര്‍ട്ടിയുടെ രക്തത്തില്‍ അലിഞ്ഞതാണ്. ഇസ്ലാമിക ഭീകരരും കമ്മ്യൂണിസ്റ്റു പാര്‍ട്ടികളും ചേര്‍ന്നാണ് സ്വാതന്ത്ര്യാനന്തരകാലം മുതല്‍ രാജ്യ വിരുദ്ധ പ്രവര്‍ത്തനം നടത്തി വരുന്നത്, സുരേന്ദ്രന്‍ ചൂണ്ടിക്കാട്ടി.
നിയമ സംവിധാനത്തില്‍ വെള്ളം ചേര്‍ക്കാതെ ഗവര്‍ണര്‍ മുന്നോട്ട് പോകുമ്പോള്‍ ഇതിനെതിരെ എസ്എഫ്‌ഐ തെമ്മാടിക്കൂട്ടത്തെ ഉപയോഗിച്ച് അക്രമം അഴിച്ചുവിടുകയാണ്. നിയമവാഴ്ചയെ അട്ടിമറിച്ച് ഭരിക്കാനുള്ള നീക്കം പരാജയപ്പെടുമെന്ന് പിണറായി വിജയന്‍ അറിഞ്ഞിരിക്കണമെന്നും സുരേന്ദ്രന്‍ പറഞ്ഞു.
ബിജെപി ആലപ്പുഴ ജില്ലാ പ്രസിഡന്റ് എം.വി. ഗോപകുമാര്‍ അദ്ധ്യക്ഷനായി. സംസ്ഥാന സെക്രട്ടറി പന്തളം പ്രതാപന്‍, വക്താവ് സന്ദീപ് വാചസ്പതി, ഒബിസി മോര്‍ച്ച സംസ്ഥാന പ്രസിഡന്റ് എന്‍.പി. രാധാകൃഷ്ണന്‍, ജനറല്‍ സെക്രട്ടറി അരുണ്‍ പ്രകാശ്, ബിജെപി ദേശീയ സമിതിയംഗം വെള്ളിയാകുളം പരമേശ്വരന്‍, ജില്ലാ ജനറല്‍ സെക്രട്ടറിമാരായ വിമല്‍ രവീന്ദ്രന്‍, അരുണ്‍ അനിരുദ്ധന്‍, മേഖലാ സെക്രട്ടറി ബി. കൃഷ്ണകുമാര്‍, ടി.കെ. അരവിന്ദാക്ഷന്‍, രണ്‍ജീതിന്റെ സഹോദരന്‍ അഭിജിത്ത് തുടങ്ങിയവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: